ҚТЖ пойыз билеттерінің неге қымбаттағанын түсіндірді
Қазақстандықтар соңғы уақытта пойыз билеттерінің бағасы ұшақ билеттерімен шамалас болып кеткеніне жиі шағымданды. Осыған байланысты «Қазақстан темір жолы» ұлттық компаниясы тарифтердің қалыптасу тәртібіне түсініктеме берді.
Компания өкілдерінің айтуынша, теміржол билеттерінің бағасы бекітілген тарифтер негізінде белгіленеді және ол маусымға немесе билеттің қашан сатып алынғанына байланысты өзгермейді. ҚТЖ басқарма төрағасының орынбасары Әнуар Ахметжановтың сөзінше, қолданыстағы тарифтер заңнамаға сәйкес реттеледі. Оның айтуынша, билет құнының өсуі жолаушылар тасымалы саласындағы шығындардың артуымен, инфрақұрылымды күтіп ұстау және вагон паркін жаңарту қажеттілігімен байланысты.
Соған қарамастан, ҚТЖ өкілдері көптеген бағыттарда теміржол көлігі әуе тасымалына қарағанда әлі де қолжетімді екенін алға тартты. Алайда жолаушылар арасында «пойыз бұрынғыдай арзан көлік түрі болудан қалып бара жатыр» деген пікір жиілеп келеді. Бұл мәселе әсіресе жазғы демалыс маусымы мен сұраныс жоғары бағыттарда айқын байқалады.
ҚТЖ мәліметінше, жолаушылар ағынының өсуіне байланысты қосымша бағыттар іске қосылып, вагондар саны көбейтілген. Компания бұл шаралар қызмет сапасын жақсартып, тасымал қауіпсіздігін арттыруға мүмкіндік береді деп сендірді.
