Нұр-Сұлтанда киностудия салынбайды
Мәдениет және спорт министрі Ақтоты Райымқұлова Нұр-Сұлтанда киностудия салу мәселесіне нүкте қойылғанын айтты.
— Қазақстан Республикасының «Кинематография туралы» заңы қабылданғаннан кейін шынымен де Нұр-Сұлтанда жеке киностудия салу туралы мәселе көтерілген болатын. Бірақ аудит пен талқылаудан кейін қазақ киносының бренді - Алматы қаласында орналасқан Шәкен Айманов атындағы "Қазақфильм" АҚ-ты одан әрі дамыту және жетілдіру туралы шешім қабылданды. Сондықтан, қазіргі уақытта Нұр-Сұлтанда жаңа киностудия салу мәселесі деген жоқ, — деп түсіндірді министр ОКҚ-да өткен брифингіде.
Еске сала кетейік, Мәдениет министрлігі «Астанафильм» киностудиясының құрылысы туралы 2018 жылдың қыркүйек айында хабарланған болатын. Содан кейін экс-министр Арыстанбек Мұхамедиұлы алдағы уақытта "Қазақфильм" жұмыс көлемін игере алмайтын күйге жетінін айтқан еді.
2019 жылы жоба орта жолдан кілт тоқтатылды, оның себебі туралы айтылмады.
