Обама Трампты Ақ үйді сәндеумен айналысты деп сынады

АҚШ-тың бұрынғы президенті Барак Обама Дональд Трампты ел азаматтарының күнделікті мәселелерін, соның ішінде бағаны төмендету міндетін шешудің орнына, Ақ үйді ауқымды жөндеуге көбірек көңіл бөліп отыр деп сынады.

Обаманың айтуынша, Трамптың құрылысқа қатысты жоспарлары HGTV телеарнасындағы жөндеу туралы шоуларға көбірек ұқсайды. Оның тұсында Ақ үй аумағында резиденцияның өзінен де үлкен бал залы салынып, Раушан бағының жері тас тақталармен төселген. Сондай-ақ Оңтүстік көгалда тікұшақ қонатын алаң жабдықталған.

Бұрынғы президент интерьердегі алтын түстес әшекейлердің шамадан тыс көптігіне де назар аударған.

"Мына алтынға не болған? Бәрі де алтын, үстіне тағы алтын қосылған! Ақ үй енді Саддам Хусейн Cheesecake Factory мейрамханасын ашқандай көрінеді. Алтын барлық жерде", – деді Обама.

Ол мұндай жағдайда әкімшіліктен халықтың тұрмысын жеңілдетіп, бағаны төмендетуге бағытталған нақты жұмыс күтудің қиындайтынын атап өтті.