Пойыздағы 52 адамның улануына кінәлілер жазаланады — Көлік министрлігі
Қазақстан Республикасының Көлік министрі Нұрлан Сауранбаев теміржол вагонында жолаушылардың улану оқиғасына қатысты тергеу барысы туралы мәлімдеді.
Министрдің айтуынша, 52 адамның зардап шегуіне әкелген оқиға 2025 жылдың желтоқсан айында болған.
— Вагонның жеке меншік иесімен келісім болған. Вагон ішінде суық болғандықтан, көмірқышқыл газын бөлетін жылыту жүйесі орнатылған. Қазір тергеу аяқталу сатысында, — деді Сауранбаев 2026 жылғы 24 сәуірде Сенатта өткен брифингте.
Ведомство басшысы бұл факті бойынша заңбұзушылықтар тіркелгенін, алайда оларды заң талаптарына сай дәлелдеу қажет екенін атап өтті.
— Вагон пайдаланудан шығарылды. Иелері тиісті жазасын алады, — деді министр.
Еске салайық, 2025 жылдың желтоқсанында, оның ішінде балалар да бар 52 адам пойыз Алматы-2 теміржол вокзалы станциясына келген кезде иіс тиіп, уланған болатын.
