Путин Трамп пен Си Цзиньпинге Украинадағы соғысты талқылау үшін кездесуді ұсынды
Ресей президенті Владимир Путин АҚШ президенті Дональд Трамп пен Қытай төрағасы Си Цзиньпинге үшжақты саммит өткізуді ұсынды.
Кездесуде Украинадағы соғысты тоқтату мәселесі талқылануы мүмкін. Бұл туралы The Wall Street Journal жазды.
Басылымның дереккөздеріне сүйенсек, Путин бұл ұсынысты 9 қазанда Трамппен телефон арқылы сөйлескен кезде айтқан. Ресей тарапы келіссөзді Мәскеуге тиімді шарттар негізінде жүргізуге мүдделі.
Үш ел басшысының кездесуі 18-19 қарашада Қытайдың Шэньчжэнь қаласында өтетін Азия-Тынық мұхиты экономикалық ынтымақтастығы (АТЭС) саммиті аясында ұйымдастырылуы мүмкін.
Алайда Дональд Трамп әзірге мұндай кездесуге келісім берген жоқ. Америкалық жоғары лауазымды шенеуніктің айтуынша, АҚШ президенті соғысты аяқтау жөніндегі уәдесін орындауға ұмтылғандықтан, бұл ұсынысты қарастыруы мүмкін.
Қытай тарапы да Трамп қатысуға келіссе, үшжақты кездесуге қарсы болмайтынын білдірген.
Ресей президентінің баспасөз хатшысы Дмитрий Песков ықтимал саммиттің талқыланып жатқанын растады.
"Әзірге кездесудің өзі немесе оның күн тәртібі жөнінде нақты түсінік жоқ. Дегенмен үш тарап та мұндай кездесудің теориялық тұрғыдан мүмкін екенін мойындайды", – деді Песков.
Украина келіссөзге қатыспауы мүмкін
The Wall Street Journal мәліметінше, ұсынылған форматта Украина президенті Владимир Зеленскийдің қатысуы қарастырылмаған.
Басылым мұндай кездесудің Украина мен оның Еуропадағы одақтастары арасында алаңдаушылық тудыруы мүмкін екенін жазады. Себебі соғысты тоқтату шарттары Киевтің тікелей қатысуынсыз талқылануы ықтимал.
Журналистердің дерегінше, Путин АҚШ пен Ресей арасындағы қарым-қатынастың жақсаруын пайдаланып, Украинадағы соғысты Мәскеуге тиімді жағдайда аяқтауға ұмтылып отыр.
Әзірге үшжақты саммиттің өтетіні ресми түрде бекітілген жоқ. Кездесудің нақты күні, қатысушылар құрамы мен күн тәртібі де келісілмеген.
