Құқық қорғаушылар Қазақстанды Мовлаев пен Емельянованы Ресейге бермеуге шақырды
Бірқатар халықаралық құқық қорғау ұйымдары Қазақстан билігін Мансур Мовлаев пен Юлия Емельянованы Ресейге экстрадициялауды тоқтатуға шақырды. Олар белсенділерді қамаудан босатып, халықаралық қорғау туралы өтініштерін қайта қарауды немесе қауіпсіз үшінші елге кетуіне мүмкіндік беруді сұрайды.
Бірлескен мәлімдемеге Халықаралық адам құқықтары жөніндегі әріптестік, Қазақстандағы Адам құқықтары және заңдылықты сақтау жөніндегі халықаралық бюро, Freedom for Eurasia және Хельсинки адам құқықтары қоры қол қойған.
Құқық қорғаушылардың пікірінше, екі белсендіні Ресейге қайтарған жағдайда оларға азаптау және басқа да адам құқықтарын бұзу қаупі төнуі мүмкін. Олар мұндай экстрадиция Қазақстанның халықаралық міндеттемелеріне қайшы келетінін мәлімдеді.
Бұған дейін Қазақстан соттары Мовлаев пен Емельянованың босқын мәртебесін беру туралы өтініштерін қанағаттандырмаған. 10 қыркүйекте Мовлаевқа, 24 қыркүйекте Емельяноваға қатысты бұрынғы шешімдер күшінде қалды.
Мансур Мовлаев – Шешенстан басшысы Рамзан Қадыровты сынаған белсенді. Ол 2025 жылдың мамырында Қазақстанда ұсталған. Ресей оны экстремизмді қаржыландыру ісі бойынша іздестіріп отыр. Мовлаев пен құқық қорғаушылар тағылған айыптардың саяси астары бар деп санайды.
Қыркүйекте экстрадициялық қамауда отырған Мовлаевтың екі рет өзіне қол жұмсауға әрекет жасағаны хабарланған. Оның ісіне БҰҰ-ның арнайы баяндамашысы да назар аударған.
