Қылмыс құрбандарына өтемақы төлеу қорында 8,5 млрд теңге жатыр: депутат төлемді көбейтуді ұсынды
Құрылтай депутаты Снежанна Имашева қылмыстан зардап шеккен азаматтарға берілетін өтемақы мөлшерін арттыруды ұсынды.
Оның айтуынша, соңғы сегіз жылда Жәбірленушілерге өтемақы төлеу қорынан небәрі 855 млн теңге төленген, ал қорда 8,5 млрд теңгеге жуық қаражат қалған.
Депутат бұл мәселе бойынша Бас прокурор Берік Асыловқа, Ішкі істер министрі Ержан Сәденовке және Қаржы министрі Мәди Такиевке сауал жолдады.
Имашеваның айтуынша, 2018 жылдан бері жұмыс істейтін қорға 2026 жылғы шілдеге дейін 9,3 млрд теңгеден астам қаражат түскен. Алайда сегіз жыл ішінде шамамен 5,5 мың жәбірленуші ғана өтемақы алған.
"Осындай қаражат бола тұра, неге төлем көлемі салыстырмалы түрде аз деген заңды сұрақ туындайды", – деді депутат.
Қазір қордан жыныстық қылмыстардан зардап шеккен кәмелетке толмағандарға, азаптау құрбандарына, денсаулығына ауыр зиян келген азаматтарға және қылмыс салдарынан қаза тапқандардың жақын туыстарына біржолғы өтемақы беріледі. Сондай-ақ заңда көзделген өзге санаттар да қамтылған.
Өтемақы мөлшері 30–50 айлық есептік көрсеткішті (АЕК) құрайды. Депутаттың айтуынша, бұл мөлшер қор құрылғаннан бері қайта қаралмаған.
Имашева өтемақыны көбейтуді немесе оны алуға құқығы бар азаматтардың санатын кеңейтуді ұсынды. Сонымен қатар жәбірленушілердің өз құқықтары туралы қаншалықты хабардар екенін анықтау қажет екенін айтты.
Депутат өтемақыны рәсімдеу кейде төрт айға дейін созылатынын да сынға алды. Осыған байланысты төлем тағайындау процесін цифрландыруды және қор жұмысына кешенді талдау жүргізуді ұсынды.
