«Қызылжар» футбол клубының бұрынғы президентіне іздеу жарияланды
Солтүстік Қазақстан облысында "Қызылжар" футбол клубының бұрынғы президенті, 72 жастағы Григорий Лорияға іздеу жарияланды.
Оны облыстық Экономикалық тергеп-тексеру департаменті іздестіріп жатыр.
Іздеуде жүрген адамдардың дерекқорындағы мәліметке сәйкес, іздеу жариялауға Қаржылық мониторинг агенттігі бастамашы болған.
Бұған дейін Григорий Лорияның өзіне сеніп тапсырылған бөтеннің мүлкін иемдену немесе талан-таражға салу, сондай-ақ салықтар мен бюджетке төленетін басқа да міндетті төлемдерді төлеуден жалтару ісі бойынша күдікті екені хабарланған.
Қолда бар ақпаратқа сүйенсек, Лория Экономикалық тергеп-тексеру департаментіне жауап алуға келмеген. Сондай-ақ оны сырттай қамауға алуға санкция беру туралы тергеу өтінішхаты қаралған сот отырысына да қатыспаған. Осыдан кейін оған іздеу жарияланған.
Григорий Лория 1954 жылғы 18 наурызда дүниеге келген. Ол – Қазақстан азаматы.
Еске салайық, 2024 жылы «Қызылжар» футбол клубында бюджет қаражатының жымқырылғаны анықталған болатын. Аталған істің бір эпизоды бойынша клуб бухгалтері Ольга Замелацкая сотқа тартылды.
2026 жылдың қаңтарында сот оны 7 жыл 6 айға бас бостандығынан айырды. Қазір ол жазасын өтеп жатыр.
Ал Григорий Лорияға қатысты бөлек қылмыстық іс тергеліп жатыр.
