Ресей Киевтегі шетел дипломаттарын Украинадан кетуге шақырды
Ресей тарапы Украина аумағындағы нысандарға жасалатын соққылардың жалғасатынын ескертті.
Ресей Киев пен Украинаның өзге қалаларына бағытталған ауқымды соққыларды жалғастыратынын мәлімдеп, елдегі шетел азаматтары мен дипломатиялық өкілдік қызметкерлерін қауіпсіздік мақсатында Украинадан кетуге шақырды. Ал Украина президенті Владимир Зеленский Ресейдің әуе шабуылдарына жауап берілетінін айтты.
Ресей билігі шетелдіктерді Украинаға барудан бас тартуға, ал қазір сол елде жүрген азаматтарды қауіпсіздік шараларын қарастыруға шақырды. Мәскеу мұндай ескертуді елемеу адамдардың өміріне қауіп төндіруі мүмкін екенін мәлімдеді.
Ресей тарапы шабуылдардың әскери және онымен байланысты нысандарға бағытталатынын айтады. Алайда Украина билігі Ресейдің әуе шабуылдарынан азаматтық инфрақұрылым мен бейбіт тұрғындар да зардап шегетінін бірнеше рет мәлімдеген.
Зеленский жауап соққылары туралы айтты
Украина президенті Владимир Зеленский өз кезегінде Ресейдің әуе шабуылдары жауапсыз қалмайтынын мәлімдеді.
Оның сөзінше, Украина Ресей аумағындағы, соның ішінде елдің соғыс жүргізу әлеуетіне қатысы бар мұнай өңдеу инфрақұрылымына бағытталған соққыларын жалғастыруға ниетті.
Зеленский Украина Ресей қолданатын тактиканы толығымен қайталап, азаматтық нысандарға ретсіз шабуыл жасауды көздемейтінін де атап өтті.
