Саломе Зурабишвили өзін әлі де Грузияның президентімін деп санайды

Грузияның бұрынғы президенті Саломе Зурабишвили өзін әлі де мемлекет басшысы санайды және елдегі демократияны қолдауды жалғастыруға ниетті. Бұл туралы ол 9 қаңтарда өткен брифингте мәлім етті.

«Менің күресім соңына дейін жалғасады, өйткені мен осы елдің президентімін, менде үлкен жауапкершілік – елді бейбітшілікке жеткізу», - деді ол.

Зурабишвили сонымен қатар Тбилисиде президент резиденциясының «жалғасы» болатын жаңа кеңсенің ашылғанын хабарлады.

«Бұл Орбелиани сарайындай болмауы мүмкін, бірақ мұнда рух пен ұмтылыс бар», - дейді ол.

Зурабишвилидің айтуынша, Грузиядағы қазіргі жағдай көптен бері болмаған. Елдегі кез келген мекеме дұрыс жұмыс істемейді. Сондай-ақ ол АҚШ-тың сайланған президенті Дональд Трамптың инаугурациясына қатысатынын хабарлады.

Грузияның жаңа президенті Михаил Кавелашвилидің инаугурациясы 29 желтоқсанда өтті. Кавелашвили Конституцияда көзделген президенттік ант қабылдады. Салтанатты шараға шетелдік елшілер де, шетелдік қонақтар да шақырылмаған. Оған тек депутаттар, үкімет мүшелері, грузин православие шіркеуінің өкілдері, сондай-ақ конституциялық органдардың өкілдері қатысты. Осыдан кейін Саломе Зурабишвили президент резиденциясынан шығып кеткенімен, бірақ өкілеттігі аяқталмағанын айтты.