Ташиевтің күйеу баласы Қырғызстанда алаяқтық ісі бойынша ұсталды
Қырғызстанның Әскери прокуратурасы бұрынғы Ұлттық қауіпсіздік мемлекеттік комитетінің төрағасы Қамшыбек Ташиевтің күйеу баласы деп аталатын Азамат Дыйқанбаевты ұстады.
24.kg басылымының мәліметінше, оған қатысты «Қызметтік жағдайын пайдаланып алаяқтық жасау» бабы бойынша қылмыстық іс қозғалған.
Жалал-Абад гарнизоны Әскери прокуратурасының дерегіне сәйкес, Дыйқанбаев Манас аудандық ішкі істер бөлімінің уақытша ұстау изоляторына қамалған.
«Қазіргі уақытта істің барлық мән-жайын және басқа да ықтимал қатысушыларды анықтауға бағытталған тергеу әрекеттері жүргізілуде», - деп жазады басылым.
Жергілікті ақпарат құралдарының хабарлауынша, Азамат Дыйқанбаев Қамшыбек Ташиевтің күйеу баласы болуы мүмкін. Сондай-ақ ол әр жылдары ұлттық қауіпсіздік органдары жүйесінде қызмет атқарғаны айтылады.
Қамшыбек Ташиев ісі
Қамшыбек Ташиев бұған дейін Қырғызстанның Ұлттық қауіпсіздік мемлекеттік комитетін басқарған. Биыл ақпан айында 75 адам Қырғызстан президенті Садыр Жапаров мен Жогорку Кеңеш төрағасына мерзімінен бұрын президент сайлауын өткізу туралы үндеу жолдаған болатын.
Кейін, 10 ақпанда Садыр Жапаров Қамшыбек Ташиевті барлық мемлекеттік қызметінен босатты.
Жапаров бұған дейін бұл жағдайды «трагедияға айналдырмауға» шақырған.
Ташиев қызметінен кеткеннен кейін Қырғызстанның күштік құрылымдарында ауқымды өзгерістер жүргізілді:
-
оның орынбасарлары қызметтерінен босатылды;
-
Шекара қызметі ҰҚМК құрамынан шығарылды;
-
президентке тікелей бағынатын жаңа Мемлекеттік күзет қызметі құрылды.
Садыр Жапаров кейінірек Ташиевпен достық қарым-қатынасты сақтайтынын, бірақ оның мемлекеттік қызметке қайта оралмайтынын мәлімдеген.
Бұған қоса, кейіннен Қамшыбек Ташиевке қатысты қылмыстық іс қозғалғаны да хабарланған болатын.
