Тоқаев пен ЕО басшылары ынтымақтастықтың жаңа кезеңін бастады
Қазақстан президенті Қасым-Жомарт Тоқаев Брюссельде Еуропалық кеңес төрағасы Антониу Кошта және Еуропалық комиссия президенті Урсула фон дер Ляйенмен келіссөздер өткізді.
Кездесу қорытындысында тараптар стратегиялық әріптестікті нығайту және ынтымақтастықты жаңа деңгейге көтеру туралы бірлескен мәлімдеме қабылдады.
23 маусымда Брюссельде өткен кездесуде Қазақстан мен Еуропалық одақ арасындағы саяси, экономикалық және инвестициялық ынтымақтастықтың келешегі талқыланды.
Тоқаевтың айтуынша, Қазақстан мен Еуроодақ арасындағы қарым-қатынас бүгінде өз тарихындағы ең жоғары деңгейге жеткен.
«Өзара сенім мен құрметке негізделген қарым-қатынасымыз шынайы стратегиялық әріптестік сипатына ие болды. Мен Брюссельге барлық бағыттағы ынтымақтастығымызды одан әрі тереңдету мақсатында келдім», – деді Қазақстан президенті.
Оның сөзінше, келіссөздер барысында қол қойылған келісімдер мен меморандумдар екі тараптың байланыстарды нығайтуға деген ұмтылысын тағы бір мәрте дәлелдейді.
Тоқаев Қазақстанның Орталық Азияда Еуроодақпен Кеңейтілген әріптестік және ынтымақтастық туралы келісімді (EPCA) алғаш болып қол қойған әрі ратификациялаған мемлекет екенін еске салды.
Келіссөздер қорытындысы бойынша қабылданған бірлескен мәлімдемеде Еуроодақ басшылары осы келісім аясындағы ынтымақтастықты одан әрі кеңейтуге дайын екенін білдірді.
Урсула фон дер Ляйеннің мәліметінше, EPCA келісіміне қол қойылғаннан бергі он жыл ішінде Қазақстан мен Еуроодақ арасындағы сауда айналымы екі еседен астам өскен.
Тараптар инвестициялық ахуалды жақсарту, маңызды шикізат ресурстары, энергетика, көлік, цифрландыру және жаңа технологиялар салаларындағы ынтымақтастықты кеңейтуге келісті.
Кездесуде Транскаспий халықаралық көлік бағытының стратегиялық маңызына да ерекше назар аударылды. Антониу Кошта Қазақстанды Еуропа мен Азия арасындағы көлік байланысын қамтамасыз ететін маңызды буын ретінде бағалады.
Сонымен қатар тараптар авиация саласындағы Горизонталды келісімге қол қойылғанын, сондай-ақ виза рәсімдеу тәртібін жеңілдету және реадмиссия жөніндегі келіссөздердің сәтті аяқталғанын құптады.
Айта кетілгендей, бұл келісімдер Қазақстан мен Еуроодақ азаматтары арасындағы байланыстарды одан әрі жандандыруға мүмкіндік береді.
