Трамп Путин мен Зеленскийдің жақын арада кездесетінін мәлімдеді

Оның айтуынша, келіссөздер барысында айтарлықтай нәтижеге қол жеткізуге болады.

27 қазанда журналистермен сөйлескен Трамп үш ел басшысының кездесуі жуық арада ұйымдастырылуы мүмкін екенін айтты.

"Кездесу жақын арада ұйымдастырылады. Менің ойымша, айтарлықтай ілгерілеуге қол жеткізуге болады", – деді АҚШ президенті.

AFP агенттігінің хабарлауынша, бұл мәлімдеме Трамп әкімшілігінің Украинадағы соғысты тоқтатуға бағытталған дипломатиялық күш-жігерін күшейткен тұста жасалды.

Бұған дейін, 25 қазанда Украина президенті Владимир Зеленский қараша айында Киев, Вашингтон және Мәскеу өкілдерінің үшжақты кездесуі өтетінін мәлімдеген еді. Оның айтуынша, келіссөздердің басты мақсаты – бейбіт келіссөздер процесін қайта жандандыру.

Зеленский Украина үшін қараша айындағы үшжақты келіссөздерде мемлекет басшылары деңгейіндегі жаңа кездесуді ұйымдастыру мүмкіндігін талқылау маңызды екенін атап өтті.

Зеленский: Ресейге салынған санкцияларды мерзімінен бұрын алып тастауға болмайды

Украина президенті Ресей, АҚШ және Украина басшыларының үшжақты кездесуі өтпей тұрып, Мәскеуге қарсы санкцияларды жеңілдетуге немесе алып тастауға болмайтынын ескертті.

"Санкциялар келіссөз жүргізу мүмкіндігі үшін емес, агрессия үшін енгізілді. Мен мұны америкалық делегацияға да айттым. Ресейдің келіссөзге бейілділігі туралы сөз болғанда, оны мұндай бағамен сатып алудың қажеті жоқ", – деді Зеленский.

Ол Ресеймен келіссөздер басталғанға дейін Украинаның қолындағы қысым құралдарын сақтап қалу маңызды екенін жеткізді.

"Мен Путинмен кездесуге санкцияларсыз, қаржылай қолдаусыз немесе бұғатталған активтерсіз барғымыз келмейді. Өйткені ондай жағдайда, Трамп мырза айтқандай, біздің қолымызда саудаласуға мүмкіндік беретін "көзірлер" тым аз болады", – деді Украина президенті.

Әзірге Трамп, Путин және Зеленскийдің ықтимал кездесуінің нақты күні мен өтетін орны жарияланған жоқ.