Түркі мемлекеттері арасында біртұтас түркі әліпбиінің жобасы бекітілді

2022 жылы Түркияның Бурса қаласында өткен «Түркі әлемінің ортақ әліпбиі бойынша семинарда» ортақ әліпби әзірлеу жөніндегі комиссия құру туралы шешім Түркі мемлекеттері ұйымына (ОТС) ұсынылды.

2024 жылғы 9-11 қыркүйек аралығында Бакуде ТМҰ құрған Түркі әлемінің ортақ әліпбиі жөніндегі комиссияның үшінші отырысы өтті. Жиын барысында 34 әріптен тұратын ортақ түркі әліпбиінің жобасы мақұлданды. Ұйымға мүше бес ел – Түркия, Әзірбайжан, Қазақстан, Қырғызстан және Өзбекстан біртұтас әліпбиге көшу туралы келісімге келді.

Келісімге қол қойған елдердің түркі тілдерін жеке тілдік топшаларға бөлуге болады: түрік және әзірбайжан тілдері оғыз топшасына, өзбек тілі қарлұқ тобына, қазақ және қырғыз тілдері қыпшақ тобына жатады.Әліпбидің бірігуі түркі халықтарының мәдени интеграциясына жасалған маңызды қадам бола алар еді. Біртұтас алфавит жазу жүйелеріндегі айырмашылықтарға байланысты туындаған кедергілерді жоятын ортақ тілдік кеңістікті жасайды. Бұл қадам күнделікті қарым-қатынасты, әсіресе жазбаша қарым-қатынасты жеңілдетеді, сонымен қатар мәдени саладағы өзара әрекеттестіктің тереңдеуіне жағдай жасайды, деп жазады TRT басылымы.