Украина дрондарының соққысынан кейін "Яндекс" жабдықтарын қалпына келтіруге жарты жыл кетуі мүмкін

"Коммерсантъ" басылымының мәліметінше, қазан айында Ресейдің Рязань, Калуга және Владимир облыстарындағы деректер орталықтары дрон шабуылдарына ұшыраған.

Шабуылдардан кейін компанияның бірқатар цифрлық сервисінің жұмысында ақаулар байқалған. Мәселе тек Ресейдегі пайдаланушыларға ғана емес, "Яндекс" қызметін қолданатын өзге елдерге де әсер еткен.

IT нарығы мамандарының бағалауынша, зақымданған серверлік және басқа да техникалық жабдықтарды толық ауыстыру бірнеше айға созылуы мүмкін. Бұған қажетті құрылғыларды жеткізу мерзімі, импорттық шектеулер және күрделі техникалық инфрақұрылымды қалпына келтіру жұмыстары себеп болуы ықтимал.

Сарапшылар жабдықтарды ауыстыру алты айға дейін созылуы мүмкін екенін айтады. Алайда бұл компания ресми бекіткен мерзім емес, нарық мамандарының болжамы.

Үш деректер орталығы зақымданған

8-11 қазан аралығында "Яндекстің" Ресейдегі бес ірі деректер орталығының үшеуіне дрондар соққы жасаған.

8 қазанда Рязань облысының Сасово қаласындағы орталық зақымданып, жұмысы тоқтаған. Бұл нысанда жасанды интеллект жүйелерін дамытуға арналған екі суперкомпьютер орналасқан.

9 қазанда Калуга облысындағы орталық шабуылға ұшыраған. Онда 3,8 мыңнан астам серверлік тірек болған.

Ал 11 қазанда Владимир облысындағы деректер орталығы зақымданып, қызметі толық тоқтатылған. Бұл ақпаратты Reuters агенттігі де растады.

Қызмет бағасы қымбаттауы мүмкін

"Коммерсантъ" басылымының жазуынша, "Яндекс" жоғалған есептеу қуатын қалпына келтіру үшін жаңа жабдықтарды, соның ішінде шетелдік жеткізушілерден сатып алуға мәжбүр болуы мүмкін.

Алайда әлемдік нарықта серверлік жабдықтардың тапшылығы байқалып отыр. Ресейлік Fplus электроника өндірушісінің өкілі ірі көлемдегі жабдықтарды жыл соңына дейін жеткізу қиын екенін айтқан.

Сарапшылардың пікірінше, инфрақұрылымды қалпына келтіруге және оны дрон шабуылдарынан қорғауға жұмсалатын қосымша шығындар бұлтты қызметтердің тарифіне әсер етуі мүмкін.

"Яндекс" әзірге зақымданған барлық жабдықтың қашан толық қалпына келетінін нақтылаған жоқ. Компания сервистердің жұмысын кезең-кезеңімен қалпына келтіріп жатқанын хабарлаған.

Шабуылдардан кейін Ресейдің Цифрлық даму министрлігі деректер орталықтарын қорғау мәселесін Қорғаныс министрлігімен бірлесіп қарастырып жатқанын мәлімдеді.