Украина президенті кеңсесінің бұрынғы басшысы Андрей Ермак тергеу изоляторынан босатылады
Украина президенті кеңсесінің бұрынғы басшысы Андрей Ермак тергеу изоляторынан босатылады.
Украинаның Сыбайлас жемқорлыққа қарсы жоғары соты Андрей Ермак үшін 140 миллион гривен көлеміндегі кепілақы толық төленгенін хабарлады. Осыған байланысты ол тергеу изоляторынан босатылады.
Украина президенті кеңсесінің бұрынғы басшысы 14 мамыр күні мүлікті заңдастыру ісі бойынша екі айға қамауға алынған еді. Сот оған 140 миллион гривен көлемінде кепілақы белгілеген.
Ермактың өзі мұндай қаражаты жоқ екенін айтып, адвокаттары қажетті соманы жинауға тырысатынын мәлімдеген.
Алайда 15 мамыр кешіне дейін толық сома жиналмағандықтан, ол демалыс күндерін тергеу изоляторында өткізді. Себебі кепілақымен босату туралы шешім қабылдайтын Сыбайлас жемқорлыққа қарсы жоғары сот демалыс күндері жұмыс істемеген.
Андрей Ермак Киев маңындағы «Династия» элиталық тұрғын үй кешенінің құрылысы кезінде 460 миллион гривенді (шамамен 10 миллион доллар) заңдастырды деген күдікке ілінген.
Бұрын Владимир Зеленскийдің жақын айналасында болған шенеунік өзіне тағылған айыптарды мойындамай отыр.
