Украина Саратов облысы мен Татарстандағы мұнай өңдеу зауыттарына жасалған шабуылдарды растады
Ресейдің бірнеше өңіріндегі мұнай өңдеу кәсіпорындары ұшқышсыз ұшу аппараттарының шабуылына ұшырады.
Саратов облысы мен Татарстандағы (Нижнекамск қаласы) мұнай өңдеу зауыттарына соққы жасалғанын қақтығысқа қатысушы екі тарап та растады. Бұл туралы BBC хабарлады.
Украина президенті Зеленський Саратов облысы мен Татарстандағы нысандардың зақымданғанын мәлімдеді. Алайда ол Башқұртстандағы осындай нысандарға жасалған ықтимал шабуылдың салдары туралы пікір білдіруден бас тартты.
Бұған дейін Украина Қарулы күштері Бас штабы да Нижнекамск пен Саратов облысындағы мұнай өңдеу зауыттарына соққы берілгенін хабарлаған болатын. Алайда олардың ресми мәлімдемесінде Башқұртстан туралы айтылмаған.
Уфадағы жағдай
Соған қарамастан әлеуметтік желілер мен бірқатар бұқаралық ақпарат құралдарында Уфадағы мұнай өңдеу зауытына да шабуыл жасалғаны туралы ақпарат кеңінен тарады.
Башқұртстанның жергілікті атқарушы органдары өңірде дрон шабуылы қаупі жарияланғанын растады. Қауіпсіздік мақсатында Уфа халықаралық әуежайы ұшақтарды қабылдау мен ұшыруға уақытша шектеу енгізген.
Әзірге Башқұртстан билігі инфрақұрылымның бүлінгені немесе зардап шеккендер туралы ресми ақпарат таратқан жоқ.
