Владимир Ким «Қазақмыс»-ты қаншаға сатты?
«Қазақмыс» корпорациясының 99,9% үлесін сату мәмілесінің жалпы құны – 1,18 млрд доллар. Компанияның жаңа иесі – АХҚО-да тіркелген Qazaq Acquisition Corp. Ltd.
Мәміле 2025 жылғы 5 желтоқсанда жасалған. Алдымен сатып алушы 10,6 млрд теңге, кейін тағы 51,1 млрд теңге аванс төлеген. 29 желтоқсанда бұрынғы иесі Kazakhmys Copper «Қазақмыс корпорациясына» бақылауын толық тоқтатқан.
2025 жылдың соңында сатып алушының мәміле бойынша берешегінің әділ құны 531,5 млрд теңге немесе сол кездегі бағаммен шамамен 1 млрд доллар болған. Бұған дейін төленген аванстар мен қалған міндеттемелерді қосқанда, мәміле бойынша алынған өтемнің жалпы құны 595,3 млрд теңгеге жеткен.
Kazakhmys Copper қанша кіріс тапты?
Мәміле нәтижесінде Kazakhmys Copper еншілес компаниядағы инвестициясын сатудан 416,9 млрд теңге кіріс таныған. Сатылған активтің баланстық құны 178,4 млрд теңге болған. Жалпы, 2025 жылы Kazakhmys Copper 811,8 млрд теңге пайда тапты. Ал бір жыл бұрын компания шығынмен жұмыс істеген. 2026 жылы Qazaq Acquisition Corp. Ltd. мәміле бойынша Kazakhmys Copper алдындағы қалған берешегін толық өтеген.
