Зеленский: АҚШ қыста соғысты бәсеңдету мүмкіндігін зерттеп жатыр
Украина президенті Владимир Зеленский АҚШ Украина мен Ресейдің қыс мезгілінде соғыс қимылдарын бәсеңдетуге бағытталған шаралар қабылдау мүмкіндігін қарастырып жатқанын мәлімдеді.
Бұл бастама кең ауқымды бейбіт келісімге қол жеткізу жөніндегі келіссөздердің қайта жандануымен байланысты. Зеленский бұл туралы 7 қыркүйекте Axios басылымына берген сұхбатында айтты.
Украина президентінің пікірінше, қыс басталғанға дейінгі бірнеше апта дипломатиялық келіссөздер үшін мүмкіндік туғызуы мүмкін. Сонымен бірге ол Ресей президенті Владимир Путиннің АҚШ-тағы аралық сайлау қарсаңында Дональд Трамппен қарым-қатынасын нашарлатқысы келмейді деп есептейді.
«Меніңше, Путинге Трамп керек. Ол оны ренжіткісі келмейді», – деді Зеленский.
Зеленский Ресейдің келіссөзге дайындығына күмәнмен қарайды
6 қыркүйекте Зеленский Киевте АҚШ президентінің арнайы өкілдері Стив Уиткофф және Джаред Кушнермен кездесті. Бұл олардың Дональд Трамптың екінші президенттік мерзімі басталғалы Украинаға жасаған алғашқы сапары болды.
Олар Киевке келер алдында, 5 қыркүйекте Кремльде Владимир Путинмен үш сағаттық келіссөз өткізген.
Зеленскийдің айтуынша, америкалық өкілдер Мәскеудегі кездесуден кейін «Ресей келіссөз жүргізуге дайын» деген хабар жеткізген. Алайда Украина президенті бұған күмәнмен қарайтынын айтты. Оның пікірінше, майдандағы жағдай мен Ресейдің кейінгі шабуылдарының күшеюі Мәскеудің ымыраға дайын екенін көрсетпейді.
«Энергетикаға, астыққа, электр энергетикасы нысандарына, сондай-ақ мұнай мен газ экспортына қатысты идеялар бар. Ресей екеуіміздің мүдделеріміз әртүрлі», – деді Зеленский.
Уиткофф үшжақты келіссөз болуы мүмкін екенін меңзеді
Стив Уиткофф Мәскеу мен Киевтегі келіссөздерді нәтижелі деп бағалап, жаңа үшжақты бейбіт келіссөз форматы құрылуы мүмкін екенін меңзеді.
«Айтарлықтай ілгерілеушілікке қол жеткізілді», – деп жазды Уиткофф X әлеуметтік желісінде.
Әзірге ықтимал үшжақты келіссөздің нақты форматы мен қашан өтетіні жарияланған жоқ.
