Зеленский: Чебоксарыдағы әскери зауытқа FP-5 Flamingo зымыранымен соққы жасалды
Украина президенті Владимир Зеленский Ресейдің Чувашия республикасындағы Чебоксары қаласында орналасқан әскери зауытқа украиналық FP-5 Flamingo зымырандары арқылы соққы жасалғанын мәлімдеді.
Зеленский бұл туралы 10 маусым күні Telegram-арнасында хабарлады.
Бұған дейін Чувашия басшысы Олег Николаев Чебоксарыдағы инфрақұрылым нысандары зақымданғанын айтқанымен, нақты қандай объектілер екенін ашып айтпаған еді. Ал Astra телеграм-арнасы шабуылға ұшыраған нысандардың бірі қорғаныс саласындағы «ВНИИР-Прогресс» кәсіпорны болғанын хабарлады.
– Біз Ресейдің әскери нысандары мен мұнай саласына қарсы алыс қашықтықтағы украиналық соққыларды жалғастырып жатырмыз, – деді Зеленский.
Украина Қарулы күштері өрт шыққанын растады
Украина Қарулы күштері Бас штабының мәліметінше, шабуылдан кейін «ВНИИР-Прогресс» зауыты аумағында өрт шыққан.
Соққыны Украина Қарулы күштерінің Зымыран әскерлері мен артиллерия бөлімдері жасаған.
Украина тарапы бұл кәсіпорынды Ресейдің жоғары дәлдіктегі қару-жарағына арналған навигациялық жабдықтардың негізгі өндірушілерінің бірі деп атайды.
Бас штабтың хабарлауынша, зауыт:
-
спутниктік навигация қабылдағыштарын;
-
«Комета» типті антенналарды;
шығарады. Бұл жабдықтар:
-
Shahed («Герань-2») дрондарында;
-
«Калибр» қанатты зымырандарында;
-
«Искандер-М» жедел-тактикалық зымыран кешендерінде;
-
авиациялық бомбаларды жоспарлау және түзету модульдерінде қолданылады.
Куйбышев мұнай өңдеу зауытына да соққы жасалған
Зеленскийдің айтуынша, 10 маусымға қараған түні Самара облысындағы Куйбышев мұнай өңдеу зауыты да шабуылға ұшыраған.
Оның мәліметінше, бұл нысан майдан шебінен 900 шақырымнан астам қашықтықта орналасқан.
Украина Қарулы күштерінің дрон күштері шабуылды 1-жеке орталық пен «Мадьяр құстары» атанған 414-бригаданың операторлары жасағанын хабарлады.
Украина тарапының мәліметінше, Куйбышев мұнай өңдеу зауыты «Роснефть» компаниясының Самара тобындағы ең ірі кәсіпорындардың бірі саналады.
Зауыттың жылдық өңдеу қуаты – 7 миллион тонна мұнай, бұл Ресейдегі жалпы мұнай өңдеу көлемінің шамамен 2,5 пайызына тең.
Кәсіпорын бензин, дизель отыны және мазутты қоса алғанда 30-дан астам өнім түрін шығарады.
Өз кезегінде Самара облысының губернаторы Вячеслав Федорищев өңірде зымыран қаупі жарияланғанын мәлімдеді. Дрон шабуыл қаупіне байланысты облыста «Кілем» жоспары енгізілген.
