Зеленский: Киевке АҚШ қорындағы Patriot зымырандарының 5 пайызы қажет
Украинаға Ресей шабуылдарының күшеюіне байланысты Patriot әуе қорғаныс жүйелеріне арналған зымыран-тосқауылдар аса қажет.
Бұл туралы Украина президенті Владимир Зеленский бейсенбі, 13 тамызда жарияланған CNN телеарнасына берген сұхбатында мәлімдеді.
Оның айтуынша, егер АҚШ Украинаға өз қорындағы зымырандардың 5 пайызын сатса, бұл алдағы қыстан аман өтіп, адамдардың өмірін сақтап қалуға жеткілікті болар еді.
«Егер олар бізге 10 пайызын сата алса, біз Ресейдің барлық баллистикалық зымырандарын жоямыз. Қазір бізде 1 пайызы ғана бар», – деді Зеленский.
Ол қажетті мөлшердегі Patriot зымырандарын алуға небәрі бірнеше ай уақыты қалғанын атап өтті.
«Мен тіпті жариялай алмайтын істермен айналысып жатырмын. Бұл заңға қайшы дегенді білдірмейді. Бірақ ол туралы айта алмаймын», – деді Украина президенті.
Зеленский сондай-ақ АҚШ президенті Дональд Трамптың Украинаға Patriot зымырандарын өз бетінше өндіруге рұқсат беру жөніндегі уәдесі нақты қалай жүзеге асатыны әзірге белгісіз екенін айтты.
«Бұл – мен үшін үлкен сынақ, соғыс басталғалы бері тап болған ең үлкен қиындықтардың бірі», – деді ол.
Украинада зымыран-тосқауылдар 2,5 есе азайған
Зеленскийдің сөзінше, биыл Украинада зымыран-тосқауылдар 2025 жылмен салыстырғанда 2,5 есе аз. Ал Ресей ай сайын бұрынғыдан екі еседен астам көп баллистикалық зымыран қолданып отыр.
Соңғы айларда Ресей әскері Украинаға шабуылдарын күшейтіп, Киевке кемінде аптасына бір рет жаппай зымыран соққысын жасап келеді. Жуырдағы шабуылдардың бірінен кейін Киев Украина Қарулы күштері Ресей ұшырған 28 баллистикалық зымыранның бірде-бірін атып түсіре алмағанын мәлімдеді. Бұған қажетті әуе қорғанысы құралдарының жетіспеуі себеп болған.
Украина АҚШ пен Израильдің Иранға қарсы соғысы басталғаннан кейін Patriot жүйесіне арналған зымыран-тосқауылдардың қатты тапшылығына тап болғанын мәлімдеген еді. Тамыз айының басында Трамп АҚШ-тың өзіне де Patriot жүйесіне арналған зымырандар қажет екенін айтқан.
Украина Қарулы күштері атып түсірілген баллистикалық зымырандар туралы деректерді жариялауды тоқтатады
12 тамызда Украина Әуе күштері атып түсірілген баллистикалық зымырандар жөніндегі күнделікті егжей-тегжейлі мәліметтерді жариялауды тоқтататыны хабарланды.
Әуе күштерінің баспасөз хатшысы Юрий Игнат Украина Қарулы күштері анықталған барлық әуе нысандары туралы халықты нақты уақыт режимінде ескертуді жалғастыратынын, алайда баллистикалық зымырандарға қатысты бұдан былай тек жалпыланған ақпарат берілетінін айтты.
