Мал азығын жеткізудің машақаты көп

Сайт әкімшілігі

27.08.2021, 09:30

1096

Павлодар облысы Баскөл ауылының тұрғындары соңғы 20 жыл бойы жемшөп тасудың ауыртпалығын тартып келеді. Ертіс өзені арнасының ар жағына өтетін көпір болмағандықтан, шабылған шөпті қораға дейін жеткізу қиынның қиыны. Осы жолдың бойында талай трактор суға кетіп, адам өлімі де тіркелген-ді.

Мал азығымен қамтудың машақатына әбден «қанық» болған ауылдықтар төрт түлік ұстауды қойды. Ет пен сүтті дүкеннен сатып алуға көшті. Ал шағын қожалықтары бар тұрғындар әлі күнге дейін жол азабын тартып келеді. Бұған дейін шабындық жерлерге өтуге мүмкіндік беретін Қ.Сәтбаев атындағы каналдың паромы әбден тозған. Ол апаттық жағдайда болғанына қарамастан, тұрғындар мал азығын сол арқылы тасиды. Одан басқа амал жоқ. Көпір тек бір тракторға арналғандықтан, шөп тиелген тіркемелер кезек келгенше ұзақ уақыт күтеді. Бәрінен де өзен арнасының ар жақ, бер жағына өткені үшін алынатын ақы тұрғындарды титықтатып тұр. Пароммен өтудің жол ақысы – 1000 теңге. Шаруалар күніне шабындық жерге бірнеше рет барса, бірнеше мың теңге төлеуге мәжбүр.

Мәселені шешу үшін жергілікті жұртшылық шенеуніктерге қарап алақан жайып отырған жоқ. Былтыр белсенді азаматтар бас қосып, Семейдің Курчатов қаласынан 12 жылжымалы көпір сатып алды. Әрқайсысы 350 мың теңге тұрады. Жеткізу қызметіне тағы 200 мың теңге төледі. Алайда тұрғындардың өз қалтасынан шыққан миллиондаған қаржыға сатып алынған көпір әлі күнге дейін орнатылған жоқ. Себебі оларды құрастыратын арнайы техника мен мамандар, тиісті рұқсат қағаздар болмай тұр.

Ауыл тұрғыны Амангелді Кенжеғалин осы қиындықтардың барлығы ауылдағы ағайынды әбден титықтатқанын айтып, базынасын білдірді.

– Соңғы 20 жыл бойы бұл мәселенің түйіні бір тарқамай-ақ қойды. Осы уақыт аралығында талай трактор суға кетті. Қайбір жылдары жылжымалы көпірдің өзі су астында қалып, өзен арнасының ар жағына жете алмай, қиналып едік. Басқа шығындар аздай, өткен-кеткен сайын 1000 теңгелік ақы алуы тағы бар. Мұндай ауыртпалықтардан кейін мал ұстағың келмей кетеді, – дейді тұрғын.

Май ауданының басшылығы бұл мәселені шешуге асықпайды. Жергілікті тұрғындарға ұсыныстарын айтып, кеңес берумен ғана шектеліп отыр. Аудан басшысының орынбасары Медет Шоқановтың айтуынша, аудандық деңгейде көпір салуға бағытталған бюджеттік бағдарлама жоқ. Сол себепті қазынадан қаражат қарастыру мүмкін емес.

– Баскөл ауылының маңында 5000-нан астам шабындық жер бар. Оның 3000 гектарға жуығы 23 шаруа қожалығы мен 17 тұрғынға жалға беріліп отыр. Май ауданының әкімдігі «Бизнестің жол картасы-2025» бағдарламасы бойынша инфрақұрылым тарту мәселесін қарастырған еді. Бірақ бұл жоба бюджеттік бағдарлама талаптарына сай келмейді. Сондықтан кәсіпкерлерге құны 3 млн теңге болатын жобалық-сметалық құжаттаманы жасау қажет. Сол кезде ғана облыстық бюджеттен көпір өткеліне қаражат сұрай аламыз, – дейді аудан басшысының орынбасары.

Демек, жүктің барлығы тағы жергілікті тұрғындардың мойнына жүктелген. Әкімдік «шөпті қалай тасысаңдар, өздерің біліңдер» деген сыңай танытып отыр. Бұған дейін көпір өткелінің құрылымдарына миллиондаған қаржы шығарған азын-аулақ малы бар ағайын тағы 3 миллион теңгені қайдан тапсын?! Жобалық құжатты жасаған күннің өзінде, облыстық бюджеттен қаржы бөлінеріне еш кепілдік жоқ. Сондықтан баскөлдіктер әлі бірнеше жыл апаттық жағдайдағы көпір арқылы мал азығын тасуға мәжбүр. Бұл уақытта тағы да оқыс жағдайлар тіркелмесе игі.

Тегтер: мал шаруашылығы мәселе әкімдік жергілікті әкімшілік

ҰҚСАС ЖАҢАЛЫҚТАР

Арайлым ЕРКЕБАЕВА 09:05
Діннен тірек таба алмай адасқандарға ақпараттық түсіндіру тобы көмекке келуде
Сайт әкімшілігі 12.08.2022, 10:21
Қарағанды облысында жол-көлік апаты салдарынан үш адам қаза тапты
Сайт әкімшілігі 12.08.2022, 08:51
ШҚО-да қарттар үйінің лауазымды тұлғалары 7,4 млн теңге жымқырған
Бифат ЕЛТАЕВА 11.08.2022, 16:56
Жас таланттарды анықтайтын жоба
Сайт әкімшілігі 11.08.2022, 15:06
Қостанайда балабақша тәрбиешісі үш жасар бүлдіршіннің сүйегін сындырған – министрлік
Сайт әкімшілігі 11.08.2022, 10:22
Қазақстанның бірқатар өңірінде бейсенбі күні бұршақ аралас жаңбыр күтіледі

Аңдатпа


  • "Төбесі құлап жатыр". Талғарда 3 миллиард теңгеге салынған мектеп төңірегінде дау туды
    08:58
  • Қасақана өртеді: Тараздағы әскери бөлімдегі жарылысқа қатысты тың дерек шықты
    12.08.2022, 08:47
  • «Үйдің жыртығын жамау мүмкін емес»: Елордада 50 жыл болған жатақхана құлағалы тұр
    11.08.2022, 09:04
  • Смайыловтың Президентке ұсынған болжамы дөп келе ме?
    10.08.2022, 09:37
  • «ЭКСПО-2017»: Миллиардттарға салынған мақтаулы нысандар су астында қалды
    09.08.2022, 08:49