БҰҰ: Газа секторындағы ғимараттардың шамамен 80%-ы қираған немесе зақымданған
Біріккен Ұлттар Ұйымы Қауіпсіздік кеңесінің Газа бойынша жоғарғы өкілі және ұйымның аймақтағы арнайы үйлестірушісі Николай Младенов Газа секторындағы атысты тоқтату зорлық-зомбылық деңгейін айтарлықтай азайтқанымен, өңірде қалпына келтіру жұмыстары әлі басталмағанын мәлімдеді.
«Газа секторындағы ғимараттардың шамамен 80 пайызы зақымданған немесе толықтай қираған. Бір миллионнан астам адам тұрақты баспанасыз қалды. Қазір олар шатырларда және қираған ғимараттардың үйінділерінде өмір сүріп жатыр», — деді ол БҰҰ жаңалықтар орталығына берген мәлімдемесінде.
Младенов БҰҰ Қауіпсіздік кеңесінің 2803-резолюциясын шұғыл түрде жүзеге асыру алға жылжымаса, жағдай одан әрі нашарлайтынын айтты.
«Қауіп — қазіргі ауыр ахуалдың қалыпты құбылысқа айналып кетуінде. Тағы бір буын шатырларда, қорқыныш ішінде өседі, ал үмітсіздік олар үшін ең табиғи сезімге айналады», — деді ол.
Ал БҰҰ-ның Таяу Шығыстағы бейбіт үдеріс жөніндегі арнайы үйлестірушісінің орынбасары Рамиз Алакбаров оккупацияланған Палестина аумақтарындағы жағдайдың «барған сайын тұрақсыз» болып бара жатқанын мәлімдеді.
Оның айтуынша, зорлық-зомбылық Газа секторында да, Батыс жағалауда да күшейіп келеді.
«Газа секторында 2803-резолюциясының орындалуының кешеуілдеуі, күнделікті зорлық-зомбылық пен жалғасып жатқан гуманитарлық дағдарыс атысты тоқтатқаннан кейін пайда болған бастапқы үмітті әлсіретіп жіберді», — деді Алакбаров.
Ол сондай-ақ Шығыс Иерусалимді қоса алғанда, оккупацияланған Батыс жағалауда қоныстанушылардың зорлық-зомбылығы күшейіп жатқанын ескертті. Оның мәліметінше, Израиль билігі қоныстарда 2200-ден астам жаңа тұрғын үй салу жоспарын мақұлдаған.
Биыл палестиналық қауымдарға қарсы шабуылдар күрт көбейген. Алакбаровтың сөзінше, шамамен 220 палестиналық елді мекен шабуылға ұшыраған, ал зорлық-зомбылық тұтас қауымдардың қоныс аударуына себеп болып жатыр.
Палестина Қызыл Жарты Ай қоғамы өкілі Рами Хиджо халықтың бірнеше рет қоныс аударуға мәжбүр болғанын, денсаулық сақтау жүйесінің күйрегенін және гуманитарлық ұйым қызметкерлеріне төнген қауіптің күшейгенін айтты. Оның ішінде биыл жыл басында Палестина Қызыл Жарты Ай қоғамының медицина қызметкерлері қаза тапқан.
БҰҰ мәліметінше, Газа секторындағы гуманитарлық жағдай әлі де өте ауыр күйде қалып отыр. Анклавта шамамен 1 миллион адам шұғыл түрде баспана көмегіне мұқтаж. Халықтың басым бөлігі әлі күнге дейін босқын күйінде өмір сүріп жатыр.
Ұйымның айтуынша, қаржылық және операциялық шектеулер гуманитарлық көмекті жеткізуге үлкен кедергі келтіруде. Атап айтқанда, бақылау-өткізу бекеттеріндегі кідірістер, бүлінген жолдар және өмірлік маңызды жүктерді жеткізуге қойылған шектеулер жағдайды ушықтырып отыр.
БҰҰ үйлестіріп отырған 2026 жылға арналған шұғыл гуманитарлық көмек бағдарламасы Газа секторы мен Батыс жағалаудағы шамамен 3 миллион адамға қолдау көрсету үшін 4 миллиард доллардан астам қаражат жинауды көздейді. Алайда қазіргі уақытта бұл жоспар небәрі 13 пайызға ғана қаржыландырылған.
