Венесуэлада жойқын екі жер сілкінісі болды

Венесуэланың Ішкі істер министрлігі ғимараттардың қирағанын растады.

Елдің уақытша президенті Делси Родригес мемлекет аумағында төтенше жағдай жариялады.

АҚШ Геологиялық қызметі (USGS) апат салдарынан қаза тапқандар саны 10 мыңнан 100 мың адамға дейін жетуі мүмкін деген болжам жасады. Алайда Венесуэла билігі әзірге құрбандар туралы ресми ақпарат жариялаған жоқ.

Алғашқы жер сілкінісінің магнитудасы 7,2, ал бір минутқа жетпейтін уақыттан кейін болған екінші дүмпудің магнитудасы 7,5 болды.

Бірінші жер сілкінісінің эпицентрі Кариб теңізі жағалауындағы Морон қаласынан батысқа қарай 28 шақырым жерде, шамамен Каракастан 168 шақырым қашықтықта орналасқан. Жер сілкінісінің ошағы 13 шақырым тереңдікте тіркелді.

Екінші жер сілкінісінің эпицентрі Морон қаласынан 16 шақырым жерде, ал ошағы 10 шақырым тереңдікте болды.

Венесуэланың Ішкі істер министрі Диосдадо Кабельо өрт сөндірушілер мен полиция апат салдарын жою үшін барлық күшті жұмылдырып жатқанын айтты. Ол қаза тапқандар мен зардап шеккендердің жақындарына көңіл айтты.

Каракаста көптеген тұрғын бұзылған ғимараттардан эвакуацияланды. Кейбір үйлердің қабырғалары құлап, көшеден пәтер ішіндегі жиһаздар көрініп қалған.

Ресейдің Венесуэладағы елшілігі ғимараты бүлінбеген, дипломатиялық миссия қалыпты жұмысын жалғастырып жатыр.

Әлеуметтік желілерде Каракас әуежайы мен Кариб жағалауындағы Ла-Гуайра порт қаласындағы қирандылардың видеолары тарады. Кейін Делси Родригес әуежайдың уақытша жабылғанын растады.

Оның мәліметінше, екі негізгі жер сілкінісінен кейін 20 афтершок тіркелген.

25 маусымға жоспарланған Венесуэла парламентінің пленарлық отырысы да кейінге шегерілді.

АҚШ-тың цунами туралы ескерту орталығы алғашында Пуэрто-Рико, Виргин аралдары, сондай-ақ Венесуэла жағалауындағы Аруба, Кюрасао және Бонайре аралдары үшін цунами қаупі бар екенін хабарлаған. Алайда шамамен бір сағаттан кейін бұл ескерту күшін жойды.

Венесуэла Кариб және Оңтүстік Америка тектоникалық плиталары түйісетін сейсмикалық белсенді аймақта орналасқан.

Сонымен қатар 25 маусымға қараған түні Жапонияның Хонсю аралының солтүстік-шығыс жағалауында да магнитудасы 6,9–7,2 болатын жер сілкінісі тіркелді. Әзірге зардап шеккендер туралы ресми мәлімет жарияланған жоқ.