Румыниядағы көпқабатты үйге ресейлік дрон құлады
Румынияның Галац қаласында Ресейдің дроны көпқабатты тұрғын үйдің шатырына құлап, салдарынан өрт шықты.
Бұл туралы Румынияның Төтенше жағдайлар қызметі мен Қорғаныс министрлігі мәлімдеді.
Оқиға 29 мамырға қараған түні болған. Дрон тұрғын үйдің 10-қабаты деңгейіндегі пәтерге тиіп, жарылғыш бөлігі толық детонацияланған. Соның салдарынан өрт шығып, екі адам зардап шекті. Оларға медициналық көмек оқиға орнында көрсетілген.
Қауіпсіздік мақсатында ғимараттан 70 тұрғын эвакуацияланды. Кейін өрт толық сөндірілді.
Румыния Қорғаныс министрлігі құлаған аппараттың Ресейге тиесілі дрон екенін хабарлады.
Оқиға Ресей армиясының Украина аумағына жасаған кезекті әуе шабуылымен тұспа-тұс келді. Сол түні ресейлік дрондар Украинаның Одесса облысындағы Измаил порты орналасқан ауданға соққы жасаған.
Измаил — Дунай өзені бойындағы Украинаның ең ірі порттарының бірі. Ол Румыния шекарасына жақын орналасқан және Ресейдің шабуылдары кезінде стратегиялық нысан ретінде жиі нысанаға алынады.
Соңғы жылдары Ресейдің Украинадағы әскери операциялары кезінде дрондар мен зымырандардың Румыния аумағына құлау оқиғалары бірнеше рет тіркелген. Румыния — NATO мүшесі болғандықтан, мұндай жағдайлар альянс елдерінің қауіпсіздігіне қатысты алаңдаушылықты күшейтіп отыр.
