Жазылу
822 баптан тұрады: Мәжіліс депутаттары жаңа Салық кодексін жұмысқа алды
Мәжіліс депутаттары Қазақстанның жаңа Салық кодексінің жобасын жұмысқа қабылдады. Бұл туралы Палатаның осы сессиядағы бірінші пленарлық отырысында Мәжіліс депутаты Татьяна Савельева мәлім етті, деп хабарлайды Жас Алаш тілшісі.
«Салық кодексінің жобасы 822 баптан тұрады, қолданыстағы Салық Кодексін және оны қолданысқа енгізген заң күші жойылды. Кодекс жобасы шеңберінде мыналар ұсынылады: кейбір салалардың салық төлеушілері үшін КТС мөлшерлемесін саралау, жаңғыртуға пайданы дамыту, өңдеу және ынталандыру, қайта инвестициялау үшін салықтық шегерімдерді кеңейту, салықтар мен бюджетке төленетін басқа да міндетті төлемдер санын қысқарту, барлық арнаулы салық режимдерін оңтайландыру, салықтық жеңілдіктер беруді мониторингілеу мен талдауға тәсілдерді қайта қарау, ал сондай - ақ салықтық әкімшілендіруді жетілдіруге ықпал ететін шаралар», - деді Татьяна Савельева.
Депутаттың сөзінше, ілеспе заң жобасы заңнаманы Жаңа Салық кодексінің жобасына сәйкес келтіру қажеттілігіне байланысты әзірленді. Және Қазақстан Республикасының үш кодексіне және 19 Заңына өзгерістер мен толықтырулар енгізуді көздейді.
«Қаржы және бюджет комитеті осы заң жобаларын жұмысқа қабылдауға және олар бойынша қорытынды дайындауға дайын»,- деп қосты депутат.
Бұған дейін Ұлттық экономика министрлігі – құжат 2025 жылдың шілдесіне дейін қабылданатынын мәлімдеген. Кодекс 2026 жылы 1 қаңтарда күшіне енуі мүмкін.
Еске салайық, Мемлекет басшысы биылғы Жолдауында жаңа салық кодексін тағы бір жыл талқылауды ұсынды. Оның пайымынша, жаңа салық кодексі қазіргі жүйені қайта жаңғыртуға арналған. Бұл құжат салықтық әкімшілендіру ісінің салық төлеушілерге деген сенімге негізделген жаңа жүйесін қалыптастыруға тиіс.
