Талдықорғанда студентті өлтірді деген күдікпен мектеп оқушысы қамауға алынды
Талдықорғанда 20 жастағы студент Жәңгір Нұрланұлын өлтірді деген күдікпен жасөспірім қамауға алынды. Қайғылы оқиға футбол матчын бірге көргеннен кейін болған.
Оқиғаның мән-жайы әлеуметтік желілерде тарады. Қаза тапқан жігіттің анасының айтуынша, 7 мамыр күні кешке ұлы достарымен футбол көру үшін жиналған. Пәтерде шамамен он шақты адам болған, олардың арасында 17 жастағы мектеп оқушысы да жүрген.
Бір уақытта жастар арасында жанжал туындап, сөзге келіспеушілік кейін далада жалғасқан. Біраз уақыттан соң олар қайта кездескен.
Марқұмның анасының сөзінше, кәмелетке толмаған жасөспірім Жәңгірді шақырып алып, оған алты жерден пышақ сұққан. Ауыр жарақат алған студент оқиға орнында көз жұмған.
Жетісу облыстық полиция департаменті күдіктінің ұсталғанын растады.
«Қылмыс жасады деген күдікті ұсталып, уақытша ұстау изоляторына қамалды. Мамандандырылған тергеу сотының санкциясымен оған қамауда ұстау түріндегі бұлтартпау шарасы қолданылды», — деп хабарлады ведомствоның баспасөз қызметі.
Полиция қазіргі уақытта оқиғаның барлық мән-жайын анықтау үшін жан-жақты тергеу жүргізіліп жатқанын айтты. Іс Жетісу облыстық полиция департаменті басшылығының ерекше бақылауына алынған.
Тергеу мүддесіне байланысты өзге ақпарат Қылмыстық-процестік кодекстің 201-бабына сәйкес жарияланбайтыны хабарланды.
