Қазақстанда ұйымдасқан қылмысқа қарсы күрес күшейтілді: биылдың өзінде 51 іс қозғалды
Қазақстанда 2025 жылдың басынан бастап ұйымдасқан қылмыстық топтардың (ОҚТ) қызметіне қарсы күрес шеңберінде қылмыстық жауапкершілікке тартылған тұлғалар саны күрт артты.
Ішкі істер министрлігінің (ІІМ) мәліметінше, биылғы жылдың алғашқы жартысында ғана 51 қылмыстық іс қозғалып, 150-ден аса күдіктіге қатысты тергеу амалдары жүріп жатыр.
Министрлік алғаш рет қылмыстық қоғам құру және оған жетекшілік ету фактісі бойынша трансұлттық деңгейдегі қылмыстық құрылымдарға қатысты сотқа дейінгі тергеу басталғанын атап өтті. Тергеу амалдары тек Қазақстан аумағында емес, сонымен бірге шетелде де жүргізілуде. Күдіктілердің арасында ауыр және аса ауыр қылмыстарға қатысы бар тұлғалар бар.
ІІМ Ұйымдасқан қылмысқа қарсы күрес департаментінің ресми өкілі Қуандық Алпыс мәлімдегендей, қазіргі уақытта жеті трансұлттық ұйымдасқан қылмыстық топқа және бір қылмыстық қауымдастық құру дерегіне қатысты қылмыстық іс қозғалып, тергеу жұмыстары жалғасуда. Бұл істерде халықаралық құқық қорғау органдарымен де бірлескен жұмыс жолға қойылған.
«Күзет қызметі» деген желеумен қылмыстық әрекет орын алған. Алматы қаласында ұйымдасқан қылмыспен күрес аясында жедел шаралар күшейтілді. Қала полициясы биылғы қаңтардан бастап бірнеше ұйымдасқан топқа қатысты іс қозғаған. Олардың кейбірі «күзет қызметі» деген атаумен жұмыс істеп, шын мәнінде:
• заңсыз қару сақтаумен;
• қорқытып ақша алумен;
• бұзақылықпен айналысқан.
Бұл топтар жекеменшік қауіпсіздік қызметі көрінісін жасап, іс жүзінде қалалық криминогендік ахуалды ушықтырып отырған. Сотталғандар саны артып келеді. ІІМ дерегінше, соңғы екі жылда ұйымдасқан қылмысқа қарсы күрестің нәтижесінде 90-нан аса қылмыстық іс сотқа жолданған. Олардың 13-і бойынша нақты сот үкімі шығып, 130-дан аса адамға 20 жылға дейін бас бостандығынан айыру жазасы тағайындалған. Бұл көрсеткіштер құқық қорғау органдарының жүйелі әрі табанды жұмысын көрсетеді.
Ұйымдасқан қылмыстық топтар – қоғам тұрақтылығы мен азаматтардың қауіпсіздігіне төнетін елеулі қатер. Қазақстан билігі осы қатерге қарсы күресті күшейтіп, қылмыстық топтардың тамырына балта шабуға бел буып отыр. Трансұлттық қылмысқа қарсы алғашқы істердің қозғалғаны – елдің қылмысқа қарсы саясатының жаңа кезеңге аяқ басқанын білдіреді. Ендігі міндет – әділеттілік пен заң үстемдігін қамтамасыз ете отырып, қылмысқа нөлдік төзімділік ұстанымын нығайту.
