Әл-Фараби даңғылындағы жол апаты: Министрлік тараптардың татуласуына қатысты пікір білдірді
Ішкі істер министрінің бірінші орынбасары Санжар Әділов Алматыдағы Әл-Фараби даңғылында үш адамның өмірін қиған резонанстық жол-көлік оқиғасына қатысты маңызды мәлімдеме жасады.
Мәжіліс кулуарында журналистер айыпталушының жәбірленуші тараппен татуласуы немесе олардың жазаны жеңілдету туралы өтініші қылмыстық жауапкершіліктен босатуға негіз бола ала ма деген сауал қойды.
«Мүмкін емес», – деп қысқа қайырды Санжар Әділов.
Оның айтуынша, ішкі істер органдарының негізгі міндеті оқиғаны жан-жақты әрі қысқа мерзімде тергеп-тексеру болған.
Вице-министрдің сөзінше, бұл жұмыс толық көлемде орындалған. Сонымен қатар Әділов жәбірленушілер тарапынан берілген қарсы өтініш, сондай-ақ келтірілген материалдық және моральдық шығынның өтелуі сот үкімі шығарылған кезде жеңілдететін мән-жай ретінде ескерілуі мүмкін екенін атап өтті. Алайда бұл факторлар айыпталушыны қылмыстық жауапкершіліктен толық босатуға негіз болмайды.
Еске салайық, Алматыдағы Әл-Фараби даңғылында болған жантүршігерлік жол апаты салдарынан үш адам қаза тауып, оқиға қоғамда үлкен резонанс тудырған болатын.
