Алматыда құрылыс компаниясының талап арызынан кейін журналист Борейконың шоттары бұғатталды

Оған Борейконың жариялаған материалдары себеп болған. Ол жердегі ақпараттардың бірқатарын тұрғындардың өздері де, мемлекеттік орган өкілдері де растаған, ал журналистің өзі тек сөйлеген сөздерді таратумен ғана айналысқан.

«Бұл дүйсенбіде, 27 сәуір күні түстен кейін болды. Мен дәмханаға шай ішуге кіріп, барлық банктік қосымшаларымда шектеу тұрғанын көрдім, ал біреуінде «арест» (бұғаттау) деп жазылып тұрды. Осыдан кейін ғана барып маған келген SMS-хабарламаны көрдім: сіздің депозиттеріңізге шектеу қойылды. Сот орындаушысының тегі мен нөмірі де жазылған. Бірақ шектеу тек депозиттерге емес, менің барлық банктердегі шоттарыма (жеке тұлға ретінде де, ЖК ретінде де), сондай-ақ зейнетақы картасына дейін барлық банктік карталарыма қойылған. Мен сот орындаушысынан тек маған қарсы құрылыс компаниясынан азаматтық талап арыз түскенін ғана білдім. Ол жолда жүргендіктен, басқа ақпарат бере алмады. Содан кейін Бостандық аудандық сотынан соттың 19 мамыр сағат 15:00-ге белгіленгені және оның бейнебайланыс арқылы өтетіні туралы хабарлама алдым. Сағат 15:38-де соттан талап арыздың өзін де алдым. Талап қоюшы – «Etude-Ybyrai» ЖШС сенімді өкілі Бақыт Қасыбаев», - деп жазды Борейко сейсенбі күні әлеуметтік желідегі парақшасында.

Оның айтуынша, Etude-Ybyrai – «бұл Алматыдағы 12-ші шағын ауданның қақ ортасында Premier ТК (тұрғын үй кешенін) салып жатқан құрылыс компаниясы».

«Талап арыз «жауапкердің (яғни менің – В.Б.) жария кеңістікте (әлеуметтік желілердегі аккаунттарым атап өтіледі) талап қоюшыға қатысты оның іскерлік беделіне нұқсан келтіретін, сондай-ақ айтарлықтай мүліктік шығындарға әкеп соқтырған көрінеу жалған мәліметтерді жүйелі түрде таратуына» байланысты берілген. Талап арыз сомасы – 71 млн теңге. Сонымен қатар, бұл сома барлық банктерге қойылған, бірақ менде ешбір банкте мұндай қомақты қаражат жоқ. «Гиперборей» ютуб-арнасында Premier ТК туралы жеті рет айттық. Алдымен – Biz Birgemiz бағдарламасында, онда мен баға беруден барынша аулақ болып, оқырмандар жіберген роликтерді көрсеттім: бұл 2025 жылдың 25 қарашасында, 1, 8 желтоқсанында және 2026 жылдың 5 қаңтарында болды. Бұл ретте роликтердің авторлары – осы құрылысқа наразы болған 12-ші шағын ауданның тұрғындары. Олар басында құрылыс салушы ретінде «Everest Development» ЖШС-ін атаған болатын (себебі дәл соның сайтында Premier ТК пәтерлері белсенді түрде жарнамаланған), «Etude-Ybyrai» ЖШС-ін емес», - деді автор.

Сонымен қатар, ол Etude-Ybyrai компаниясының «2025 жылдың қаңтарына дейін «Everest-Ybyrai» ЖШС деп аталғанын, кейін қайта тіркелгенін» атап өтті.

«Осы жылдың 6 қаңтарында тұрғындардың өтініші бойынша біз Мәжіліс депутаты Бақытжан Базарбекпен бірге 12-ші шағын ауданға бардық. Депутат кездесуге Алматының мемлекеттік орган өкілдерін шақырды. Олар: сәулет және қала құрылысы басқармасы басшысының орынбасары Арман Айшуаков; жер қатынастары басқармасы басшысының орынбасары Тимур Тұрсыбеков; қала құрылысын бақылау басқармасының өкілі Қолдас Бекмурзаев; Әуезов ауданы әкімінің орынбасары Қанат Сағындықов. Сондай-ақ құрылыс салушы тараптан «Etude-Ybyrai» ЖШС директоры Мақсат Сембаев пен талап арыз берген компанияның заң бөлімінің бастығы Бақыт Қасыбаев болды. Құрылыс салушы құрылысқа рұқсат құжаттары бар екенін алға тартты. Мемлекеттік орган өкілдері ЖСҚ (жобалау-сметалық құжаттама) сараптамасының оң қорытындысы жойылғанын, ал нысандағы құрылыс-монтаждау жұмыстарының басталғаны туралы талон-хабарлама тізілімнен алынып тасталғанын айтты. Өз кезегінде құрылыс салушы бұл ақпараттың ескіргенін, сараптама қайта өткізілгенін және жұмысты жалғастыруға ешқандай кедергі жоқ екенін айтты», - деді журналист.

Ол репортаж барысында өз пікірін білдірмегенін, тек барлық спикерлерге микрофон ұсынғанын алға тартады.

«Кездесу соңында осы жағдай бойынша арнада сөйлегісі келетіндердің бәрін өз роликтерін жіберуге шақырдым. Осы рейстен кейін құрылыс аз уақытқа тоқтатылды, бірақ тез арада қайта басталды. 26 қаңтарда Biz Birgemiz бағдарламасының кезекті саны шығып, мен 12-ші шағын аудандағы құрылыс тақырыбына қайта оралдым. Тұрғындар кезекті ролик жіберді. Сондай-ақ сөз кезегі менің ұсынысымды пайдаланып, видео жіберген «Etude-Ybyrai» ЖШС заң бөлімінің бастығы Бақыт Қасыбаевқа берілді. Ол құрылысқа қажетті барлық рұқсат құжаттарының бар екенін қайталады. Сонымен қатар, сол шығарылымда мен Базарбектің ҚР Өнеркәсіп және құрылыс министрлігінің Құрылыс істері комитетіне жазған хатын оқып бердім», - деп түсіндірді автор.

2 наурызда тұрғындардың ролигі шығып, онда олар өмір сүру сапасының нашарлауына әкеп соққан құрылысқа қарсы күресті жалғастыратындарын айтқан.

«Енді талап қоюшы жұмыстың мәжбүрлі түрде тоқтап қалуынан шығынға батқанын және жобаға деген сенімнің төмендеуінен пәтер сатылымы азайғанын алға тартуда. Осының бәріне бір адам – барлық мүдделі тараптарға сөз берген журналист Вадим Борейко кінәлі деп санайды», - деп хабарлады Борейко.