Алматы тауларында Оңтүстік Корея азаматы іздестіріліп жатыр
Алматы тауларында Оңтүстік Корея азаматын іздеу жұмыстары күшейтілді.
Қазір Талғар асуы маңында жоғалған туристі іздеуге шамамен 130 адам қатысып жатыр.
Төтенше жағдайлар министрлігінің мәліметінше, іздеу жұмыстарына 10 арнайы техника, кинологтардың 8 тобы, 11 дрон және министрліктің авиациясы тартылған. Құтқарушылар шатқалдар мен тау беткейлерін үздіксіз тексеріп жатыр.
Іздеу жұмыстарына таулы аймақтың қолжетімсіз болуы, аумақтың кеңдігі және биіктік айырмасының едәуір болуы кедергі келтіріп отыр.
1953 жылы туған Оңтүстік Корея азаматы 28 қыркүйекте бір топ туристпен бірге "Шымбұлақ" аспалы жолы арқылы тауға көтерілген. Кейін ол қалаға өздігінен түсуге шешім қабылдаған.
Алайда ер адам қонақүйге оралмаған. 29 қыркүйекте оны іздеу жұмыстары басталған.
Қазіргі уақытта құтқарушылар туристің болуы мүмкін деген аумақтарды кезең-кезеңімен тексеріп жатыр.
