Апелляциялық сот Иаков Воронцовты психиатриялық стационарда қалдырды

Бұл туралы «Власть» басылымына оның адвокаты Ғалым Нұрпейісов хабарлаған.

Адвокаттың айтуынша, қазіргі уақытта Воронцов Ақтас кентіндегі арнайы мекемеде жатыр. Онда дәрігерлер оның жағдайын бақылап, комиссиялық қорытынды әзірлеп жатыр.

– Қазір оған ешқандай ем жүргізіліп жатқан жоқ. Өйткені ем тағайындау үшін нақты диагноз қажет. Осы аптаның соңына қарай немесе келесі аптада комиссия құрылып, қорытынды шығарады. Содан кейін материалдар қайтадан тергеушіге жіберіледі, – деді Ғалым Нұрпейісов.

Адвокат сараптама кезінде заң бұзылғанын айтты

Қорғаушының сөзінше, сотқа дейінгі тергеу кезінде жүргізілген психиатриялық сараптама барысында заң бұзушылықтарға жол берілген.

Оның айтуынша, Воронцов сараптамадан өтуден заңды түрде бас тартқан. Алайда оған қарамастан күштеп тексеруге жеткізілген.

– Сараптама жүргізу мүмкін емес деген қорытынды жасаудың орнына дәрігерлер өз болжамдарын жазып шыққан. Сараптама қорытындысын алған соң мен олардың әрекеттеріне байланысты денсаулық сақтау департаментіне шағым түсірдім, – деді адвокат.

Нұрпейісовтің пікірінше, азамат тексеруден бас тартқан жағдайда дәрігерлер оның психикалық жағдайы туралы жорамал жасамауы керек еді.

Қорғаушы дәл осы қорытынды кейін Воронцовты психиатриялық стационарға жіберуге негіз болғанын айтады.

– Мұның бәрі сотқа дейінгі тергеу кезінде адам құқықтарының бұзылуынан туындап отыр. Бұл – жүйелі мәселелердің салдары, – деді адвокат.

Воронцов қалай ұсталды?

Иаков Воронцов 13 ақпанға қараған түні ұсталған болатын.

Кейін Алматының әкімшілік соты оны есірткі заттарын медициналық мақсаттан тыс қолданды деп танып, 10 тәулікке қамаған.

23 ақпанда әкімшілік қамау мерзімі аяқталған соң ол тергеушіге жеткізілді.

Адвокаттың айтуынша, оған Қылмыстық кодекстің:

• 302-бабы («Есірткі притонын ұстау»);

• 296-бабы («Өткізу мақсатынсыз есірткі сақтау»)

бойынша айып тағылған.

25 ақпанда тергеу соты оны екі айға қамауға алу туралы шешім шығарған.

Тергеуші оны психиатриялық мекемеге жіберуді сұраған

2026 жылғы 13 мамырда тергеуші Атахан Воронцовты қамаудан босатып, психиатриялық көмек көрсететін мамандандырылған медициналық ұйымға орналастыру туралы сотқа өтініш берген.

Сот қаулысында бұл қауіпсіздік шарасы сотқа дейінгі тергеу аяқталғанға дейін сақталатыны, ал қажет болған жағдайда мерзімі тергеу судьясының шешімімен бір айға ұзартылуы мүмкін екені көрсетілген.

Ғалым Нұрпейісовтің айтуынша, тергеу психиатриялық сараптама жүргізу мәселесін сәуір айында көтерген, алайда қорғау тарапы бұған келіспеген.

– Біз бұған үзілді-кесілді қарсымыз. Кез келген сараптамаға нақты негіз болуы тиіс. Иаков Воронцовтың психикалық ауытқуы бар екенін көрсететін ешқандай белгі болған жоқ. Бұл бізді қатты алаңдатып отыр. Біз қорғауымыздағы адамның тағдырына алаңдаймыз, – деген ол «Азаттыққа» берген сұхбатында.

Құқық қорғаушылар алаңдаушылық білдірді

21 мамырда Алматының тергеу соты Иаков Воронцовты психиатриялық стационарға жіберу туралы шешім шығарғаны белгілі болды.

Ал 22 мамырда адвокаттардың апелляциялық шағымы қаралмай тұрып-ақ Воронцов психиатриялық мекемеге ауыстырылған.

Құқық қорғаушылар бұл жағдайда Қылмыстық-процестік кодекс талаптары мен Қазақстанның халықаралық міндеттемелері бұзылған деп есептейді.

Олардың пікірінше, Воронцовты психиатриялық стационарға орналастыру туралы шешім қорғау тарапының толық қатысуынсыз және процессуалдық кепілдіктер сақталмай қабылданған.

Иаков Воронцов бұған дейін Ресейдің Украинаға басып кіруін ашық сынағаны және Қазақстанда Мәскеу патриархатына тәуелсіз православ шіркеуін құру идеясын қолдағаны үшін діни қызметкер мәртебесінен айырылған болатын.