Армения халқы Пашинянның отставкасын талап етіп жатыр

Ереван мен Арменияның басқа да қалаларында Әзірбайжанмен аумақтық концессияға қарсы наразылықтар жалғасуда. 27 мамыр күні таңертең наразылық білдірушілер бірнеше көше мен тас жолды жауып тастады.

Наразылық акциясының жетекшісі Армян апостолдық шіркеуінің Тавуш епархиясының басшысы архиепископ Баграт Галстанян. Оның өзі Саят-Нова даңғылы мен Абовян көшесінің қиылысында көлік қозғалысын жауып тастады. Полицейлер оның көлігін жылжытпақ болған, деп хабарлайды News.am. 

Армения Ішкі істер министрлігінің мәліметінше, 27 мамыр күні таңертеңгі наразылық кезінде кем дегенде 196 адам ұсталған. Наразылық жалғасуда.

Бір күн бұрын Ереванда мыңдаған адам қатысқан наразылық шеруі өтті. Оған қатысушылар Никол Пашинянның отставкаға кетуін талап етіп, Армения премьер-министрі лауазымына Баграт Галстанянның кандидатурасын ұсынды.

Наразылықтар Армения мен Әзірбайжан арасындағы шекараны анықтауға байланысты болып отыр. Екіжақты келісім бойынша Ереван Арменияның Тавуш аймағы мен Әзірбайжанның Газах аймағы арасындағы төрт ауылды Бакудің бақылауына қайтарды.

Фото: Александр Патрин/ ТАСС