Атырау мұнай өңдеу зауытында өрт шықты
25 тамызда сағат 12:55 шамасында «112» қызметіне Атырау мұнай өңдеу зауытының аумағында түтін байқалғаны туралы хабар түскен.
Нысанның ерекшелігі ескеріліп, Төтенше жағдайлар министрлігінің күштері оқиға орнына жоғары шақыру дәрежесі бойынша жедел жіберілді.
Өртті сөндіруге ТЖМ-мен қатар «Семсер өрт сөндіруші», АТМА әуежайы және NCOC компаниясының өрт сөндіру-құтқару қызметтері тартылды. Жалпы 65 адам мен 19 арнайы техника жұмылдырылған.
Оқиға орнында жедел штаб құрылып, барлық тартылған күштердің әрекеті үйлестірілді.
Мамандардың жедел жұмысының нәтижесінде сағат 13:42-де өрт оқшауланып, жалынның таралуына жол берілмеді. Қазіргі уақытта өрт толығымен сөндірілді.
Оқиға салдарынан зардап шеккендер жоқ. Өрттің шығу себебі анықталып жатыр. Жағдай ТЖ қызметтерінің бақылауында.
