Атыраудағы қанды қылмыс: Ақбаян Мұқанғалиева мен балалары қазір қайда?
Туыстарының аяусыз өліміне байланысты іс бойынша күйеуі өмір бойына бас бостандығынан айырылғаннан кейін Ақбаян Мұқанғалиеваның тағдыры ұзақ уақыт бойы белгісіз болған.
Ақбаян Мұқанғалиева Атырау облыстық психикалық денсаулық орталығында ем қабылдаған. Бұл туралы Атырау облыстық кәмелетке толмағандарды бейімдеу орталығының директоры Құндыз Ғиниятова хабарлады.
Оның айтуынша, әйел ауруханадан шыққан. Сонымен қатар ол балаларына екі рет барып келген.
Қазір оның 10, 8, 5 және 4 жастағы төрт баласы Бейімдеу орталығында тәрбиеленіп жатыр. Ал кенже ұлы балалар үйінде орналасқан.
Мамандар емнің келесі кезеңінен кейін әйелдің жағдайын қайта бағаламақ. Егер денсаулығы мен психологиялық жағдайы тұрақтанса, балаларын өз қарауына алуына мүмкіндік беріледі.
Орталық өкілінің мәліметінше, балалардың денсаулығы мен эмоционалдық жағдайы қазір тұрақты.
