Атыраудың батпағынан өте алмаған анасы балаларын тастап кеткен

Балшыққа белшеден батып шығатындар аз болмағанмен, ондай жерге туған балаларын тастап кеткен жағдай бірінші рет орын алып отыр.Белгілі болғандай, 1981 жылы туған әйел 13 қаңтар күні кешкі сағат сегізде үш баласымен Атырау мұнай өңдеу зауыты аумағына таксимен келеді. Сол арадан қара жолмен жүріп, Тасқала ауылына бармақ болыпты. Жолшыбай сегіз жастағы үлкен қызы мен үш жастағы ұлының батпақты кесіп өте алмайтыны белгілі болады. Әйел қолындағы көтерген сәбиімен үйіне кетіп қалады да, қайтып келгенде… екі баласын таппай қалады. Іле-шала зауыт күзетшілерінің шақыруымен келген полицияның жеке құрамы аяқтарынан тік тұра іздеп, сағат 23:00 шамасында ұл мен қызды бір бұтаның түбінен тауып алған. Ұл бала жалаңаяқ күйінде ұйықтап қалыпты. Тәртіп сақшылары оларды дереу жылы жерге апарып, жедел жәрдем қызметі ауруханаға жеткізіп, қазіргі күні балалар жазылып үйлеріне шыққан.         Отыз сегіз жастағы балалардың анасына жүргізілген наркологиялық зерттеу оның сол күні аздап «ұрттап» алғанын көрсеткен. Бұлардың үй-іші «қолайсыз отбасылар» есебінде тұрғаны мәлім болды. Әйелдің өзі бұған дейін де ата-аналық қызметін дұрыс орындамағаны үшін әкімшілік жауапкершілікке тартылған. Енді оның мәселесін кәмелетке толмағандар ісі жөніндегі комиссия қарайтын болады.Фото автордікі