Газдандыру – жай ғана инженерлік инфрақұрылым тарту емес
Қазақстан табиғи газ қоры мол мемлекеттердің қатарына жатады. Сондықтан елімізді көгілдір отынмен қамтамасыз ету мәселесі тек энергетика саласының ғана емес, ұлттық экономиканың, экологияның және халықтың әлеуметтік әл-ауқатының маңызды бағытына айналып отыр.
Соңғы жылдары мемлекет табиғи газдың қолжетімділігін арттыруға басымдық беріп, газдандыру жобаларын кезең-кезеңімен жүзеге асыруда. Бұл жұмыстардың нәтижесінде бұрын көгілдір отынға қолы жетпеген көптеген елді мекендер табиғи газға қосылып, тұрғындардың тұрмыс сапасы жақсарып келеді.
Көгілдір отынмен қамтамасыз ету – жай ғана инженерлік инфрақұрылым тарту емес. Бұл – халықтың өмір сүру деңгейін көтеруге, өңірлердің тұрақты дамуына және еліміздің энергетикалық қауіпсіздігін нығайтуға бағытталған ұзақ мерзімді стратегиялық саясат. Әсіресе қысы суық аймақтарда тұрғын үйлердің табиғи газға қосылуы тұрмыстық шығындарды азайтып, жылыту жүйесінің тиімділігін арттыруға мүмкіндік береді. Сонымен қатар көмір мен басқа да қатты отын түрлерін пайдаланудың азаюы атмосфераға таралатын зиянды қалдықтардың көлемін төмендетіп, экологиялық ахуалдың жақсаруына ықпал етеді.
Бүгінде елімізді көгілдір отынмен қамтамасыз ету бағытында ауқымды инфрақұрылымдық жобалар іске асырылуда. Магистральдық газ құбырлары салынып, өңірлердегі газ тарату желілері кеңейіп келеді. Соның арқасында жаңа тұрғын аудандар мен ауылдық елді мекендерге табиғи газ жеткізу мүмкіндігі артып, халықтың тұрмыс жағдайын жақсартуға нақты қадамдар жасалуда. Бұл әлеуметтік нысандардың – мектептер, ауруханалар, балабақшалар мен мәдениет үйлерінің де тұрақты әрі тиімді жұмыс істеуіне оң әсерін тигізеді.
Газдың қолжетімді болуы кәсіпкерлік пен өндірістің дамуына да жаңа серпін береді. Табиғи газды пайдаланатын кәсіпорындардың өндірістік шығындары төмендеп, өнімнің өзіндік құны азаяды. Бұл отандық өнімнің бәсекеге қабілеттілігін арттырып, жаңа инвестициялық жобаларды жүзеге асыруға мүмкіндік береді. Сонымен бірге жаңа өндірістердің ашылуы жұмыс орындарының көбеюіне және өңірлердің экономикалық белсенділігінің артуына ықпал етеді.
Дегенмен газдандыру ісінде әлі де шешімін күткен мәселелер аз емес. Магистральдық құбырдың елді мекенге жетуі барлық тұрғын бірден газ пайдаланады деген сөз емес. Үй ішіндегі газ жүйесін жүргізу, қажетті жабдықтарды орнату және қауіпсіздік талаптарын сақтау қосымша шығынды талап етеді. Сондықтан халықтың әлеуметтік осал топтарын қолдау, жеңілдетілген қаржыландыру тетіктерін дамыту және газға қосылу рәсімдерін жеңілдету маңызды бағыттардың бірі болып қала береді.
Көгілдір отынды қауіпсіз пайдалану мәдениетін қалыптастыру да ерекше назар аударуды қажет етеді. Газ жабдықтарын тұрақты техникалық тексеруден өткізу, мамандандырылған қызмет көрсету жүйесін жетілдіру және тұрғындардың қауіпсіздік ережелерін сақтауын қамтамасыз ету – адам өмірі мен денсаулығын қорғаудың маңызды шарты.
Жігер Әшім
