Халықаралық іздеуде жүрген блогер Қайсар Қамза Қазақстанға жеткізілді деген ақпарат тарады
Халықаралық іздеуде жүрген блогер Қайсар Камза Вьетнамнан Қазақстанға жеткізілді деген ақпарат пайда болды.
Журналист Михаил Козачковтың мәліметінше, блогер Вьетнамның Камрань әуежайында Қазақстанның Қаржылық мониторинг агенттігі қызметкерінің сүйемелдеуімен байқалған. Куәгерлердің айтуынша, ол Қазақстанға ұшып кеткен.
Тергеу нұсқасы бойынша, Қайсар Камза Pin-Up брендімен байланысты жабық Telegram-арна арқылы заңсыз онлайн-казиноны жарнамалауға қатысы бар деп күдікке ілінген. Аталған арна арқылы пайдаланушылар Қазақстан аумағында тыйым салынған құмар ойын сайттарына бағытталған.
Қылмыстық іс қозғалғаннан кейін блогер Қазақстаннан кетіп қалған. 2026 жылдың сәуір айында ол Қазақстан Бас прокуратурасының сұрауы бойынша Вьетнамда ұсталған болатын.
Осы қылмыстық іс аясында тағы бірнеше күдіктіге халықаралық іздеу жарияланған. Тергеу мәліметінше, олар заңсыз ойын бизнесін ұйымдастыруға және оны блогерлер мен танымал тұлғалар арқылы насихаттауға қатысы болуы мүмкін.
Әзірге Қаржылық мониторинг агенттігі блогердің Қазақстанға жеткізілгені жөнінде ресми ақпарат таратқан жоқ.
