Индонезияда екі пойыз соғысып 14 адам қаза тапты
Индонезияның Бекаси қаласындағы (Джакарта маңы) станциялардың бірінде қала маңына қатынайтын электр пойызы мен алыс қашықтыққа жүретін пойыз соғысып қалған. Қаза тапқандар бар.
2026 жылғы 28 сәуірдегі таңертеңгі мәлімет бойынша, апат салдарынан 14 адам қаза тапты. Олардың мәйіттері тану процедурасына жіберілді. Тағы 84 адам түрлі дәрежедегі жарақаттар алып, медициналық мекемелерге жеткізілді.
Оқиға 27 сәуір күні кешке болған. Апаттан кейін бірден құтқару қызметтері жолаушыларды эвакуациялап, зардап шеккендерге көмек көрсетуге кірісті. Жұмыстар аса сақтықпен жүргізілді, себебі кейбір адамдардың жағдайы ауыр болып, мамандандырылған көмекті қажет етті.
Теміржол компаниясының өкілдері қаза болғандардың отбасына көңіл айтып, қазіргі уақытта басты басымдық – зардап шеккендерді емдеу және олардың туыстарына ақпарат беру екенін мәлімдеді. Емделу шығындары мен жерлеу рәсімдері толығымен өтелетіні хабарланды.
Оқиға орнында жолаушылардың туыстарына арналған ақпараттық пункт ұйымдастырылды. Апат болған станция уақытша жабылып, бұл аймақтағы пойыздар қозғалысы шектелді.
Antara агенттігінің хабарлауынша, Индонезия президенті Прабово Субианто қайғылы оқиғаны дереу тергеуді тапсырды. Ол үкіметтің трагедияның нақты себептерін анықтауға міндетті екенін атап өтіп, медициналық қызметтерге тірі қалғандардың толық сауығып кеткенше сапалы емделуін қамтамасыз етуді жүктеді.
Президент апаттың тікелей себептерін анықтаумен қатар, теміржолдардағы қауіпсіздік шараларын күшейту ниетін білдірді. Соның ішінде, ол күзетілмейтін көптеген теміржол өткелдерінің қауіптілігіне назар аударып, көлік жүйесінің қауіпсіздігін арттыру үшін шұғыл шаралар қабылдауға уәде берді.
