Каспийдегі қайғылы оқиғадан аман қалған Бекет Қуандық әскерден елге оралды
Каспийдегі қайғылы оқиғадан аман қалған атыраулық әскери қызметші Бекет Қуандық мерзімді әскери қызметін аяқтап, туған жеріне оралды.
Бекет Ақтау қаласындағы № 29011 әскери бөлімінде мерзімді әскери борышын өтеген. 2026 жылдың күзінде Каспий теңізінде өткен әскери іс-шаралар кезінде қайғылы оқиға болып, әскери қызметшілер қаза тапқан. Бекет сол оқиғадан аман қалғандардың бірі.
Кейін оның анасы ұлының ауруханаға жатқызылмағанын және жағалауға өз күшімен жеткенін айтқан. Сол сәтте жақындары үшін ең маңыздысы – Бекеттің тірі екенін және ауыр жарақат алмағанын білу болған.
Анасының сөзінше, қаруластарының қазасына куә болған жас сарбаздардың жадында бұл оқиға ұзақ уақыт сақталары сөзсіз.
Әскери борышын өтеу кезінде көрсеткен батылдығы мен жанқиярлығы үшін Бекет Қуандық "Ерлігі үшін" медалімен марапатталған.
Қайғылы жағдайдан кейін ол әскери бөлімде қалып, белгіленген мерзімге дейін қызметін жалғастырды.
Әскери борышын толық өтеп болған Бекетті Атырау әуежайынан ата-анасы, туған-туыстары мен достары күтіп алды. Бірнеше ай бойы алаңдап, сарбаздың амандығын тілеген отбасы үшін бұл кездесу ерекше әрі көптен күткен сәт болды.
