Қазақстандықтар адам өліміне себеп болған көлік жүргізушілеріне қатысты жазаны қатаңдатуды талап еткен петиция жариялады
Алматыдағы резонанс тудырған жол-көлік оқиғасынан кейін қазақстандықтар мас күйінде көлік жүргізіп, адам өліміне себеп болған жүргізушілерге қатысты жазаны күшейтуді талап етіп, петиция жариялады.
Петиция авторларының ұсынысына сәйкес, мұндай қылмыстар үшін ең жоғары жаза мерзімі қазіргі деңгейден 15 жылға дейін ұлғайтылуы тиіс. Сонымен қатар сотталғандарды қауіпсіздігі ең төменгі емес, орташа қауіпсіздік деңгейіндегі түзеу мекемелеріне жіберу ұсынылған.
Бастамашылардың пікірінше, жол-көлік оқиғаларынан қаза табатын азаматтардың саны азаймай отырғандықтан, жауапкершілікті күшейту қоғамдық қауіпсіздікті қамтамасыз етуге және жүргізушілердің тәртібін жақсартуға ықпал етуі мүмкін.
Петиция авторлары мас күйінде көлік тізгіндеп, адам өліміне әкелген әрекеттерге қоғамда мүлдем төзбеушілік қалыптастыру қажет деп есептейді.
Қазіргі уақытта бастама қоғам талқысына ұсынылып, азаматтардың қолдауын жинап жатыр.
