Қазақстандықтар бірыңғай уақыт белдеуінің денсаулыққа әсерін зерттеуді талап етті
Қазақстанда бірыңғай уақыт белдеуіне көшу салдарын зерттеуге ел тұрғындарын қатыстыруды талап еткен жаңа петиция жарияланды. Өтініш Денсаулық сақтау министрлігіне жолданған.
Петиция авторлары уақыттың өзгеруінің адам денсаулығына кері әсері бар-жоғын жан-жақты зерттеу қажет деп санайды. Олардың айтуынша, бұған дейін Сауда және интеграция министрі Арман Шаққалиев зерттеу үш жыл ішінде жүргізілетінін мәлімдеген.
Авторлар зерттеу үшін арнайы сайт, колл-орталық, дауыс беру жүйесі немесе азаматтардың пікірін қабылдайтын жеке алаң құруды ұсынған. Олардың пікірінше, тұрғындар денсаулығындағы өзгерістерді дәрігерге уақыт белдеуімен байланыстыра алмайды, өйткені медициналық құжаттарда мұндай себеп жеке диагноз ретінде көрсетілмейді.
Сондықтан петицияға қол қойған азаматтарды зерттеуге тікелей қатыстыру ұсынылып отыр. Авторлар бұл тәсіл бірыңғай уақыт белдеуіне қатысты қазақстандықтардың нақты пікірін және жеке тәжірибесін жинауға мүмкіндік береді деп есептейді.
Сонымен қатар петицияда зерттеуге бөлінетін қаражатты үнемдемей, оны Ғылым және жоғары білім министрлігі бастапқыда жоспарлаған тәртіппен өткізу талабы қойылған.
Авторлар зерттеу нәтижелерін ашық түрде, мүмкіндігінше күн сайын жариялауды және әр қатысушыға өзінің сауалнамадағы пікірін тексеруге мүмкіндік беруді сұраған. Петицияда бұған дейін уақыт белдеуін өзгертуге негіз болған зерттеулердің толық жарияланбағаны және халық арасында алдын ала сауалнама жүргізілмегені айтылған.
