Хуситтер Сауд Арабиясындағы әуежайлар мен мұнай нысандарына шабуыл жасағанын мәлімдеді
Йеменнің солтүстігін бақылайтын "Ансар Алла" шииттік қозғалысы (хуситтер) Сауд Арабиясындағы әуежайлар мен мұнай нысандарына шабуыл жасағанын айтты.
Хуситтердің әскери өкілі Яхья Сарианың айтуынша, шабуыл нысаналарының қатарында Эр-Риядтағы Король Халед атындағы халықаралық әуежай, Янбу қаласындағы Saudi Aramco нысандары, Рабигтегі мұнай өңдеу зауыты, "Шығыс – Батыс" мұнай құбыры, Даммамдағы Король Фахд атындағы халықаралық әуежай, Наджран әуежайы және Хамис-Мушайттағы әуе базасы болған.
Сонымен қатар қозғалыс өкілдері Йеменнің оңтүстігіндегі үкіметтік күштердің әскери лагері мен әскери-теңіз базасына соққы бергенін хабарлады. Сарианың сөзінше, Аден қаласындағы нысандарда Сауд Арабиясы офицерлерінің басшылығымен, оның ішінде бригадалық генерал Бадр Салах әл-Харбидің жетекшілігімен әскери қызметкерлер дайындықтан өтіп, жабдықталған.
Ал Сауд Арабиясы бастаған араб коалициясы Эр-Рияд маңында екі дронды ұстап, жойғанын мәлімдеді. Бұл туралы Reuters агенттігі хабарлады.
Жексенбі, 25 қазанда, Эр-Риядтағы Король Халед атындағы халықаралық әуежай екі аптаға созылған үзілістен кейін ішкі және халықаралық рейстерге арналған екі терминалын қайта ашты. Бұған дейінгі зымыран шабуылы салдарынан 13 адам қаза тауып, 300-ден астамы жараланғаны хабарланған.
Иран қолдайтын хуситтер мен Сауд Арабиясы қолдау көрсететін Йемен үкіметінің әскері арасындағы қақтығыс төрт жылдық үзілістен кейін шілденің ортасында қайта өршіген. Осы кезеңде хуситтер Қызыл теңіздің батыс жағалауын және Баб әл-Мандеб бұғазы маңындағы қалаларды бақылауына алғаны айтылды.
