Қырғызстанда облыстар мен аудандар жойылып, олардың орнына округтер құрылады
Қырғызстанда әкімшілік-аумақтық реформа аясында облыстар мен аудандар жойылып, олардың орнына 20 округ құру жоспарланып отыр. Бұл туралы ел президенті Садыр Жапаров мәлімдеді.
Оның айтуынша, қазіргі таңда республикада 44 аудан және 33 қала бар.
— Облыстар мен аудандар жойылады, олардың орнына 20 округ қалады. Қарапайым тілмен айтқанда, бұл 20 облыс сияқты болады. Бірақ бұл өзгерістерге әлі 3–4 жыл бар, — деді ол Ноокат ауданы тұрғындарымен кездесу барысында.
Президенттің сөзінше, алдымен басқару жүйесінің тиімділігін тексеру үшін 2–3 жылдық пилоттық жоба ретінде бір округ құрылады. Негізгі мақсат — оның республикалық дотациядан шыға алу мүмкіндігін анықтау. Егер жоба сәтті жүзеге асса, ел толықтай округтерге бөлінеді.
Садыр Жапаров сондай-ақ әкімшілік-аумақтық реформаның алғашқы кезеңі сәтті өткенін атап өтті.
Реформалар нәтижесінде соңғы екі жыл ішінде ауылдық аймақтар саны 452-ден 231-ге дейін қысқарған.
