Қырғызстанның бұрынғы министрі АҚШ-та курьер болып жұмыс істеп жүр
Әлеуметтік желілерде Қырғызстанның бұрынғы парламент депутаты әрі экс-еңбек министрі Улукбек Кочкоровқа ұқсас адамның АҚШ-та курьер болып жұмыс істеп жүргені түсірілген видео тарады.
Кадрларда ер адамның көлікке сәлемдемелер тиеп жатқаны көрінеді. Видео авторлары оның қазіргі таңда Чикаго қаласында Amazon жеткізу қызметінде еңбек ететінін мәлімдеген.
Улукбек Кочкоров Қырғызстанда белгілі саясаткерлердің бірі саналады. Ол парламент депутаты болған, 2017 жылғы президент сайлауына қатысқан және кейін еңбек пен әлеуметтік даму министрі қызметін атқарған.
2020 жылғы саяси оқиғалардан кейін мемлекеттік қызметтен кеткен экс-шенеунік соңғы жылдары отбасымен бірге АҚШ-тың Чикаго қаласында тұрып келеді және көпшілік алдына сирек шығады.
Әзірге Кочкоров әлеуметтік желілерде тараған видеоға және курьер болып жұмыс істейтіні туралы ақпаратқа қатысты пікір білдірген жоқ.
