ҚТЖ Әлия Назарбаеваның компаниясымен келісімшартты әлі бұзбаған
Қазақстан темір жолы компаниясының төрағасы Нұрлан Сауранбаев ұлттық тасымалдаушы Әлия Назарбаеваға тиесілі делінетін Instant Payments ЖШС-мен шартты әлі бұзбағанын хабарлады, деп жазады Zhasalash.kz.
Оның айтуынша, "мәселе ұзаққа созылып кеткен”.
– Бұл мәселе ұзаққа созылып кетті. Сұрақ туындаған кезде, жоғарғы акционер бірден акционерлер қатарынан шықты. Ол жоқ. Бұл – цифрлық жұмыстармен айналысатын адамдар тобы болатын.
Компаниямен келісімшартты қазір де бұзуға болады, бірақ өйтсек біз онлайн-сатылым жасай алмай қаламыз. Бәрін бірден жұлып алып тастау мүмкін емес. Бірақ бүгін де тапсыру актісі бар. Ашық конкурс өтіп жатыр. Компания жеңді. 1 желтоқсанда конкурста жеңіске жеткен жаңа компанияға бәрі тапсырылады, - деді ол.
Экс-президенттің қызы Әлия Назарбаева 2014 жылдан бастап ҚТЖ арқылы ақша тауып келген. Оған Instant Payments ЖШС тиесілі болды. Компания пойыздарға электрондық билеттерді ресімдеу және сатумен айналысқан.
