Минспорт Шайдоровқа қатысты жағдай бойынша ресми мәлімдеме жасады
Қазақстан Туризм және спорт министрлігі мәнерлеп сырғанаудан ұлттық құраманың көшбасшысы Михаил Шайдоровқа қатысты қоғамда қызу талқыланған жағдайға түсініктеме берді.
Спортшының қаржыландырылуы мен төлемдеріне байланысты мәселе ресми түрде шешімін тапқан.
Бұл жөнінде Туризм және спорт вице-министрі Серік Жарасбаев мәлімдеді. Оның айтуынша, бұған дейін туындаған бюрократиялық кедергілер толық жойылған.
Министрлік не дейді?
Вице-министрдің сөзінше, бүгінде барлық қажетті құжаттар мен келісімшарттарға екі тарап та қол қойған.
-
Спортшыны қаржыландыру толық көлемде қайта қалпына келтірілді;
-
Бұған дейінгі төлемдердің кешігуі мен өзге де келіспеушіліктер толық реттелді;
-
Министрлік мәнерлеп сырғанаушының алдағы маңызды жарыстарға дайындығына кедергі келмеуі үшін жағдайды ерекше бақылауға алған.
Еске салайық, бұған дейін қазақстандық танымал мәнерлеп сырғанаушы Михаил Шайдоров жаттығу процесін қаржыландыру мен төлемдердің кешігуіне байланысты мәселені жария түрде көтерген болатын.
Бұл жағдай әлеуметтік желілерде кеңінен талқыланып, отандық спорттағы өзге де қаржылық проблемаларды ашып көрсетті. Атап айтқанда, Алматыдағы Айсұлу әйелдер хоккей клубының өкілдері де бес ай бойы жалақы ала алмағандарын мәлімдеген еді.
Министрлік өз кезегінде елдің жетекші спортшыларын қолдау мемлекет саясатының маңызды бағыты екенін атап өтіп, мұндай мәселелерге алдағы уақытта жедел әрекет етуге уәде берді.
