«Наурыз» тұрғын үй бағдарламасына өтініш беру қашан аяқталады?

«Наурыз» тұрғын үй бағдарламасы бойынша өтінімдер 25 сәуірден бастап қабылданып жатыр. Өтінімдер жұмыс күндері сағат 9.00-ден 21.00-ге дейін қабылданады. 

«10 мамырдағы жағдай бойынша қазақстандықтар барлығы 17 432 өтінім жолдады. Оның ішінде 8 945 өтінім сәтті қабылданды, олардың жартысы – 3955 өтінім тұрғын үйге кезекте тұрған халықтың әлеуметтік осал топтарының өкілдерінен түскен. Бұл көпбалалы отбасылар, жетім балалар, тұрғын үйі апатты деп танылған азаматтар. Гендерлік бөліністе қарайтын болсақ, өтінімдер арасында 57% әйелдер жолдаған. Барлық өтініш берушілердің 62% 35 жасқа дейінгі жастар. Ең жас үміткер – Түркістан облысының 18 жастағы тұрғыны», - деді спикер.

Сонымен қатар, өтінімдерді қабылдау мерзімі барынша ұзартылған. Үміткерлер маусым айының соңына дейін 1,5 ай ішінде өтініш бере алады.Сондай-ақ өтінім беру күні мен уақыты ұпай санағанда ескерілмейтін болады. Өтінімдерді қабылдау мерзімі аяқталғаннан кейін саралау басталады. 

«2 436 өтінім қабылданбай, кері қайтарылды. Негізгі себеп – клиенттердің депозиттерінде 1 млн теңге мөлшеріндегі қажетті сома жоқ болып шыққан. Бұл «Наурыз» бағдарламасына қатысудың негізгі шарттарының бірі. Сондай-ақ, тұрғын үйі бар адамдардың да өтінімдері қабылданбады», - деді спикер ОКҚ алаңында өткен баспасөз конференциясында.

Тағы 5 008 өтінім бойынша мемлекеттік дерекқорлармен сәйкестендіру жүргізілуде және жүйе өтінімдерге ЭЦҚ көмегімен үміткерлердің қол қоюын күтуде.

Фото: ортком