Жазылу
Осман Мерт: Түркі халықтары өзара жазбаша сөйлесуіміз керек
Әзірбайжан астанасы Бакуде Түркі әлемінің ортақ әліпбиі комиссиясының екінші отырысы өтті. Бұл туралы Анадолы агенттігі хабарлады.
Халықаралық Түркі академиясының басшысы, профессор Шахин Мұстафаевтың төрағалығымен өткен жиынға Әзірбайжан Ұлттық ғылым академиясының (АМА) президенті Иса Хабиббейли, Әзірбайжандағы Ататүрік орталығының басшысы Низами Джафаров, сондай-ақ Түркия, Қазақстан, Қырғызстан, Өзбекстан және Солтүстік Кипр Түркия Республикасының (СКТР) ғалымдары қатысты.
Түркі тілі қоғамының басшысы Осман Мерт журналистерге берген сұхбатында түркі әлемі жазбаша қарым-қатынасқа мұқтаж және осы бастамалар аясында жауапты қадамдар жасалып жатқанын айтты.
Оның айтуынша, түркі мемлекеттері ортақ әліпбиге көшуде айтарлықтай академиялық жетістіктерге жетті, бірақ саяси шешімдер қабылдау үшін біраз уақыт қажет болуы мүмкін.
Мерт Кеңес Одағының ыдырауымен тәуелсіздік алған түркі республикалары үшін жаңа бет ашылғанын айтады.
«Бұл кездесуде болған оқиға шын мәнінде тарихи миссияны жүзеге асыру болып табылады. Біз жазбаша сөйлесуіміз керек және оған қол жеткізуіміз керек. Түркия, Әзірбайжан, Өзбекстан және Түркіменстан латын әліпбиін қолданады», - деді Мерт.
Сонымен қатар, ол қазір бұл мәселе әлі латын әліпбиіне көшпеген Қазақстан мен Қырғызстанның еншісінде екенін атап өтті.
«Қазақстанның латын әліпбиіне көшуі 2025 жылға қарай жүзеге асуы мүмкін. 2026 жылы Бірінші түркологиялық құрылтайға 100 жыл толады. Ортақ әліпби тақырыбын 2026 жылы аяқтаймыз деп отырмыз. Тарих бізге бұл жауапкершілікті жүктеді және біз шешуші болуымыз керек», - деп қосты ол.
Фото: aa.com.tr
