Пентагон Кубаға әскери операция жүргізуге дайындалып жатқан болуы мүмкін
АҚШ Қорғаныс министрлігі — Пентагон Кубада әскери операция жүргізу ықтималдығын қарастырып жатыр.
АҚШ әскери құрылымдары егер президент Дональд Трамп тиісті бұйрық берсе, әрекет етуге дайын екенін мәлімдеді. USA TODAY басылымына берген түсініктемесінде Пентагон түрлі күтпеген жағдайларға арналған жоспарлар әзірленіп жатқанын және президенттің кез келген тапсырмасын орындауға әзір екенін жеткізген.
Ақпаратқа сәйкес, АҚШ пен Куба арасындағы шиеленіс биыл қаңтар айынан бері күшейген. Сол кезде Трамп әкімшілігі Кубаға мұнай жеткізілімдерін шектеп, аралдағы коммунистік үкіметті саяси өзгерістерге мәжбүрлеуге бағытталған кең ауқымды қысым саясатын бастаған.
Сонымен қатар, екі ел де дағдарыстан шығу жолдарын іздеудің бастапқы кезеңінде екенін мойындағанымен, тараптардың қандай деңгейде ымыраға келуге дайын екені әзірге белгісіз. Қазір АҚШ пен Куба ықтимал экономикалық келісім бойынша келіссөздер жүргізіп жатыр.
Бұған дейін Дональд Трамп Кубаны «кеш болмай тұрғанда» АҚШ-пен келісім жасауға шақырғаны хабарланған.
